Gżira United u Floriana Veterans komplew jirbħu l-logħbiet tagħhom sabiex komplew jissieltu għar-rebħ tal-VMFA Cisk Premier League.
Gżira United għadhom fl-ewwel post hekk kif għelbu lil Rabat 5-2. L-attakkant Brażiljan Daniel Mariano Bueno skorja doppjetta filwaqt li Pio Schiriha, Sebastian Nayar u Ian Zammit żiedu aktar gowls sabiex eventwalment aċċertaw li t-tim tagħhom jiksbu l-15-il rebħa staġjonali. Andre Scicluna u Timothy Zammit naqqsu l-marġni tal-iskor għar-Rabtin li kienu qed isofru d-disa’ telfa fil-kampjonat.
Floriana baqgħu jiġru wara l-Maroons wara rebħa ta’ 6-1 kontra Birkirkara St Helen’s. Il-Greens amministraw din il-partita bl-aħjar mod possibbli filwaqt li ma tawx ċans lill-Karkariżi jilagħbu l-logħba tipika tagħhom. Christian Cassar, Manolito Micallef u Glenn Bonello skorjaw doppjetta kull wieħed sabiex għalxejn kien il-gowl ta’ Jean Pierre Mifsud Triganza. Hekk kif il-Furjaniżi kisbu l-15-il rebħa tagħhom, huma baqgħu punt taħt Gżira.
F’partita li kellha xejn inqas minn 18-il gowl, iċ-champions MFPA għelbu lil Hibernians 13-5. Kienet logħba fejn il-Malta Football Players Association urew il-potenzjal tagħhom u kellhom lil Michael Galea, Julian Galea u George Frendo li wettqu tripletta kull wieħed. Alexander Ribic skorja doppjetta filwaqt li Mark Barbara u Carlo Mamo taw il-kontribut tagħhom b’aktar gowls. Malcolm Camilleri skorja doppjetta għall-Pawlisti filwaqt li Ilia Nazarov, Adrian Lanzon u Beppe Antignolo komplew inaqqsu l-iskor għat-tim tagħhom.
KLASSIFIKA – Gżira 46, Floriana 45, MFPA 32, Birkirkara St Helen’s 30, Rabat 20, Żurrieq 15, Hibernians 12, Żejtun Red Stars 0.
