Raġel ta’ 35 sena residenti f’San Ġwann inżamm arrestat hekk kif ġie mixli fil-Qorti li seraq lil ommu, wara li rrifjutat li tkompli tagħtih il-flus biex isostni l-vizzju tiegħu tad-droga. Hu ġie akkużat ukoll quddiem il-Maġistrat Rachel Montebello li wkoll taha fastidju.
Il-każ seħħ nhar il-31 ta’ Marzu li għadda fejn omm l-akkużat irrapportat lil binha lill-Pulizija u spjegatilhom li hu jbati mill-vizzju tad-droga kif ukoll li, għal dawn l-aħħar sitt snin, kien jitlobha l-flus kull tlett ijiem. B’kollox, qalet li kienet għaddietlu xejn inqas minn €33,000.
Waqt is-seduta fil-Qorti, l-omm talbet biex tkellem lill-Maġistrata fejn spjegatilha li ma tistax taċċettah aktar f’darha, minħabba l-fatt li dan kien beda jisirqilha oġġetti ta’ valur finanzjarju u sentimentali, fosthom dawk li jfakkruha f’żewġha u missieru li llum huwa mejjet.
Id-Difiża, immexxija mill-Avukat Ilona Schembri, għamlet talba biex l-akkużat jinżamm fit-Taqsima Forensika fl-Isptar Monte Carmeli bil-għan li jegħleb il-vizzju tad-droga.
Il-Qorti laqgħet it-talba, filwaqt li ħarġet ordni ta’ protezzjoni favur l-omm.
Il-Prosekuzzjoni tmexxiet mill-Ispettur Sherona Buhagiar.
