Fil-Knisja Ta’ Ġieżu fil-Belt Valletta se tkun qed tingħata esperjenza ġdida, b’simbolu ta’ tama, waqt l-espożizzjoni tal-Kurċifiss mirakoluż fuq l-artal maġġuri tal-Knisja.
Din is-sena, flok ġurnata, il-Kurċifiss se jkun espost ukoll matul il-lejl, fejn il-pubbliku saħansitra se jkollu l-opportunità li jqerr. Hawn se tkun esposta wkoll relikwa tal-beatu Carlo Acutis, bħala sinjal li l-qdusija teżisti wkoll fi żminijietna.
Tkellimna dwar dan mal-Gwardjan tal-Kunvent u l-Knisja ta’ Ġieżu, il-Patri Franġiskan Ramon Farrugia.
“Se nagħtu din l-esperjenza ġdida fejn se niftħu l-Knisja bil-lejl. Il-Knisja tiftaħ fl-10:00 ta’ bil-lejl tal-Ħamis u se nagħmlu lejl miftuħin għat-talb fis-skiet.”
Patri Ramon Farrugia, Gwardjan tal-Kunvent u Knisja ta’ Ġieżu
Din se tibqa’ mitfuħa sas-7:00 ta’ filgħodu, meta mbagħad jibda l-programm tal-quddies.
“Jekk hemm persuni li huma vulnerabbli, li qed jieħdu xi kura u ma jistgħux jitħalltu mal-bqija tan-nies, dawn jistgħu jikkuntattjawna, għax nofs siegħa qabel ma niftħu għan-nies, bejn id-9:30 u l-10:00 se nipprovdu dan il-ħin għalihom.”
Gwardjan tal-Kunvent u Knisja ta’ Ġieżu
Hu ħabbar ukoll li se jkun qed jitqassam tajjar mimsus mal-Kurċifiss ta’ Ġieżu, li jkun mas-santa.
Hawn elenka wkoll għall-kordinazzjoni li qed issir anke mal-Uffiċċju tal-Prim Ministru, b’rabta mal-purċissjonijiet tad-Duluri u l-Ġimgħa l-Kbira.
“Qegħdin f’kuntatt dirett mal-Uffiċċju tal-Prim Ministru u s-Sur Aaron Zahra, li qed jikkordina din il-ħidma, bejn il-Kunsill Lokali, l-MTA u l-Lands, u dawn nirringrazzjahom tas-sapport biex il-poplu jkun jista’ jgħix bilanċ bejn id-divertiment, li hu importanti, imma l-ħinijiet li l-poplu jixtieq jimxi f’pellegrinaġġ, ikun jista’ jeżerċita dan id-dritt.”
Gwardjan tal-Kunvent u Knisja ta’ Ġieżu
Hawnhekk irringrazzja wkoll lill-Pulizija, li jassistu matul is-sena kollha.
