Issa żgur li isem Donald Trump se jibqa’ jissemma’ fl-istorja, hekk kif ilbieraħ, fil-jum imlaqqam ‘Liberation Day’, iddikjara emerġenza ekonomika fl-Istati Uniti u ħabbar tariffi li jibdew minn bażi ta’ 10% fuq il-pajjiżi kollha b’rati ħafna aktar ogħla fuq 60 pajjiż li,skontu, mhumiex jinnegozjaw fuq l-istess binarji mal-Istati Uniti.
Barra minn hekk ilbieraħ daħlu wkoll f’effett it-tariffi imposti fuq il-vetturi.
Iċ-Ċina, it-tieni l-akbar esportatur lejn l-Istati Uniti wara l-Messiku, issa se tkun qed tiffaċċja tariffa ta’ 54%. Il-Kanada u l-Unjoni Ewropea huma wkoll fost l-akbar esportaturi u bħaċ-Ċina diġà ddikjaraw li qed jippreparaw kontro miżuri.
Ftit sigħat biss wara din it-tħabbira, l-ishma nnegozjati fil-borża Amerikana u Ċiniża waqgħu drastikament filwaqt li d-deheb kien innegozjat bi prezz rekord hekk kif investituri qed ifittxu investimenti aktar siguri.
Ekonomisti ewlenin diġà qed juru t-tħassib tagħhom li dawn it-tariffi jistgħu jwasslu għal riċessjoni globali.
Dawn it-tariffi mistennija wkoll jimpattaw fin-negattiv liċ-ċittadini Amerikani hekk kif ħafna mill-prodotti u servizzi li s’issa kienu jutillizzaw u li kienu importati wisq probabbli ma jibqgħux ikunu aċċessibbli għalihom jew inkella jkunu bi prezzijiet ferm ogħla.
Aqra aktar:
