Il-kisba tal-Ħelsien fil-31 ta’ Marzu tal-1979, propju bħal-lum 46 sena, seħħet wara triq twila u diffiċli; wara sekli ta’ ħakmiet barranin.
Fil-kisba tal-Indipendenza, f’Settembru tal-1964, il-Gvern Malti dak iż-żmien immexxi mill-Prim Ministru George Borg Olivier iffirma ftehim ta’ difiża mal-Gvern Ingliż għal perjodu ta’ għaxar snin.
L-elezzjoni ġenerali ta’ Ġunju tal-1971 intrebħet mill-Partit Laburista mmexxi mill-Perit Duminku Mintoff.
Il-bidla fil-Gvern waslet biex bdew in-negozjati bejn il-Gvern Malti u dak Brittaniku biex ikun hemm reviżjoni fit-Trattat tad-Difiża.
Dan wasssl biex fis-26 ta’ Marzu tal-1972, f’Marlborough House f’Londra ġie ffirmat ftehim bejn il-Prim Ministru Malti ta’ dak iż-żmien Dom Mintoff u s-Segretarju tal-Istat Ingliż Lord Carrington.
Dan il-ftehim inkluda li sal-aħħar ta’ Marzu tal-1979, l-Ingliżi jħallu darba għal dejjem il-bażi militari f’Malta.
F’dan il-perjodu ta’ seba’ snin, l-Ingliżi ntrabtu wkoll li jħallsu ferm aktar minn dak li kienu jħallsu qabel. Dan hekk kif intrabtu li jridu jħallsu £14-il miljun fis-sena. Dan ifisser kważi t-tripplu minn dak li kien innegozja Borg Olivier u l-għotjiet ma kinux parti minnhom b’self, bħala dak fl-1964.
Fl-31 ta’ Marzu tal-1979, saret festa kbira ħdejn l-Għolja tal-Ħelsien fil-Birgu, fejn niżlet il-bandiera Ingliża u flokha telgħet il-bandiera Maltija.
Hawnhekk il-bażi Ingliża ħalliet pajjiżna darba għal dejjem u dan fisser il-ħelsien ta’ pajjiżna.
Din il-festa nazzjonali se tiġi ċċelebrata uffiċjalment dalgħodu għall-ħabta tal-għaxra, hekk kif il-President, il-Prim Ministru u l-Kap tal-Oppożizzjoni se jfakkru dan l-avveniment storiku fuq l-Għolja tal-Ħelsien fil-Birgu.
Waranofsinhar, għall-ħabta tan-12:30pm, se ssir ir-regatta tradizzjonali ta’ Jum il-Ħelsien fil-Port il-Kbir.
