Il-Ministru Owen Bonnici żar il-preparamenti finali tal-festival Mużika Mużika, fejn iltaqa’ mal-artisti u l-organizzaturi. Huwa faħħar is-suċċess kontinwu tal-festival, li ser jerġa’ joffri 16-il kanzunetta oriġinali bil-Malti. “Dan il-festival huwa legat li qed jissaħħaħ b’kull edizzjoni,” qal il-ministru.
Aaron Zahra, iċ-Chairman ta’ Festivals Malta, enfasizza l-kwalità għolja tal-produzzjoni. “Nixtieq nirringrazzja lil kulħadd involut li qed jagħmel dan il-festival possibbli,” qal Zahra. Frans Agius, il-Kap Eżekuttiv ta’ Festivals Malta, żied li l-preparamenti laħqu l-qofol u t-tim qed jaħdem bla heda.
Il-festival jiftaħ illum, il-Ħamis, 27 ta’ Marzu, b’16-il kanzunetta ġdida li se jintwerew live fil-MFCC Ta’ Qali u fuq TVM fid-9pm. Is-Serata tal-Klassiċi se ssir il-Ġimgħa, u s-Sibt 29 ta’ Marzu, is-16-il finalist se jikkompetu mill-ġdid, bil-parteċipazzjoni ta’ Maxine Pace u The Tenors bħala mistiedna speċjali.
