F’seduta Parlamentari l-Ħamis waranofsinhar kompliet toħroġ, biċ-ċar, l-arroganza tad-Deputat Nazzjonalista Karol Aquilina, inkluż b’attakki ripetuti kontra l-Prim Ministru Robert Abela u l-Ispeaker tal-Kamra tar-Rappreżentanti Anġlu Farrugia.
Dan hekk kif is-seduta fetħet bi tliet rulings li ġew ippreżentati minn Dr Farrugia.
L-ewwel ruling sab lil Aquilina ħati ta’ ksur ta’ privileġġ, wara li, fis-seduta tal-25 ta’ Frar li għadda, meta l-Prim Ministru kien qed jagħmel stqarrija ministerjali dwar is-serqa tad-droga mill-barracks tas-suldati, Aquilina qam jakkużah li hu sħab mal-kriminali.
Hawnhekk il-Prim Ministru talab li Aquilina jirtira din l-akkuża serja u talab għal ruling f’dan ir-rigward.
Bl-arroganza tipika tiegħu, Aquilina l-Ħamis mhux talli ma rtirax dan, iżda qam jaqra dikjarazzjoni miktuba fejn kompla jinsisti b’diskorsu simili għal dak tal-faxxa estremista fil-Partit Nazzjonalista.
Għaldaqstant, l-Ispeaker ma kellux alternattiva u sabu ħati ta’ ksur ta’ privileġġ.
“Fin-nuqqas ta’ dan, is-Sejda qegħda ssib lill-Onorevoli Karol Aquilina prima face ħati ta’ ksur ta’ privileġġ u tirreferi l-każ lill-Kumitat tal-Privileġġi.”
Anġlu Farrugia, Speaker tal-Parlament
Sadanittant, wara li fl-istess seduta tal-ġimgħa l-oħra, l-istess Karol Aquilina qam jgħajjar lill-Ispeaker Anġlu Farrugia u l-Whip tal-Gvern Naomi Cachia talbet għal ruling għal dan id-disprezz, il-Ħamis id-Deputat estremist Nazzjonalista baqa’ jinsisti fl-attakki tiegħu.
F’dan it-tieni ruling, Dr Farrugia kkwota l-kliem dispreġjattiv li ntqal minn Aquilina fil-konfront tiegħu u li ratu u semgħetu Malta kollha, fosthom “niddubita kemm taħseb int” u staqsa lid-Deputat tal-Oppożizzjoni jekk hux biħsiebu jirtira dan il-kliem.
Waqt li kellu kull ċans biex jiskuża ruħu mal-Ispeaker, Aquilina, minflok, għażel li jkompli jisfida lit-tmexxija tal-ogħla istituzzjoni b’iżjed arroganza, kif juri dan il-filmat.
Anġlu Farrugia: “Nistaqsi lil Karol Aquilina jekk hux se jirtira dan il-kliem fil-konfront tiegħi.”
Karol Aquilina: “M’għandi l-ebda diffikultà li nagħmel hekk, wara kollox kulħadd jaf il-verità dwar is-Sedja … mela ma nifhmux bil-Malti. Inżomm ma’ dak li għedt.”
It-tielet u l-aħħar ruling ittratta ilment imqajjem minn Adrian Delia fis-seduta tal-25 ta’ Frar, fejn il-Prim Ministru Robert Abela fakkar kif waqt il-pandemija nies midħla tal-Partit Nazzjonalista, fosthom l-għaqda Repubblika u Jason Azzopardi, fetħu kwerela biex jixtħu lilu, lill-Ministru Byron Camilleri u numru ta’ suldati l-ħabs.
Delia, li dakinhar kien il-Kap tal-Oppożizzjoni, qam jgħid li dan mhux veru.
Madankollu, l-Ispeaker ikkwota numru ta’ istanzi li proprju jikkonfermaw li Delia kien jaqbel ma’ dik l-istess investigazzjoni.
“Jirriżulta ċar li l-Onorevoli Delia kien qed jaqbel li ssir investigazzjoni u allura kien qed jaqbel ma’ dak li ġie rrapportat mill-istess Jason Azzopardi u l-NGO Repubblika. Huwa ċar li kien qed jappoġġja l-investigazzjoni. Kien qed jissapportja l-istess inkjesta, kien qed jagħmilha tiegħu.”
Għaldaqstant l-Ispeaker ma laqax it-talba.
