Kunsillieri tal-Partit Nazzjonalista fiż-Żurrieq għażlu li ma jiħdux pożizzjoni waqt li l-Kunsill oġġezzjona għal proġett, li qed jiġi propost li jinbena fuq art barra ż-żona ta’ żvilupp, jiġifieri ODZ.
Minkejja li, ripetutament ħadu sehem anke fi protesti kontra żvilupp fuq artijiet li ddaħħlu fl-iskema tal-iżvilupp minn żmien GonziPN sempliċiment biex ikunu populisti u issa jipprovaw jattakkaw lill-Gvern Laburista, dan il-każ il-ġdid kixef mill-ġdid l-ipokrezija grassa tal-PN.
Issa r-rappreżentanti tiegħu fil-Kunsill b’maġġoranza Laburista għażlu li la jfuħu u lanqas jintnu f’każ li jikkonċerna żona fi Triq Ħal Millieri, eżatt wara l-pompa tal-petrol fid-daħla taż-Żurrieq, fejn qed jiġi propost li jiġi żviluppat supermarket.
Anzi, agħar minn hekk, saħansitra xaqilbu lejn l-iżviluppatur.
Il-każ ġie rrapportat fil-ħarġa tal-Ġimgħa tal-ġurnal l-orizzont fejn ingħad li l-kunsill qabbad konsulenti biex iħejju oġġezzjoni formali f’ismu dwar din l-applikazzjoni quddiem l-Awtorità tal-Ippjanar.
Minkejja dan, il-kunsillieri Nazzjonalisti, immexxija mill-Minority Leader Kyle Mifsud, li hu magħruf għall-appoġġ tiegħu lil Roberta Metsola, ma qablux ma’ din il-pożizzjoni tal-Kunsill u, minflok, issuġġerrew li jidħlu f’diskussjonijiet mal-iżviluppatur biex, jekk jekk hemm bżonn, isiru xi tibdiliet fil-pjani tiegħu għaż-żona.
L-ironija u l-ipokrezija f’dan kollu jirriżultaw hekk kif, ftit tax-xhur biss ilu, deputati u kunsillieri Nazzjonalisti, fosthom l-istess Kyle Mifsud, kienu fuq quddiem nett fi protesti, bħal dawk li saru fin-Nigret u l-inħawi magħrufa bħala ‘Tal-Bebbux’.
Dan wara li hemmhekk iddaħħlu applikazzjonijiet ta’ żvilupp fuq artijiet, li setgħu jiġu żviluppati wara d-deċiżjoni skandaluża mill-Gvern Nazzjonalista fl-2006, meta żid fiż-żona taż-żvilupp artijiet madwar il-pajjiż li jagħmlu daqs is-Siġġiewi kollu.
