F’diskors fil-Parlament, il-Prim Ministru Dr Robert Abela kkumenta mill-ġdid fuq l-iskandlu tal-bolol tal-ħaddiema miżapproprijati mill-Partit Nazzjonalista. Dan wara li Partit Nazzjonalista kien ħareġ stqarrija fejn qal li din kienet biss allegazzjoni u attentat iddisprat tal-Prim Ministru biex jiddevja l-attenzjoni.
Għal dan, Dr Abela poġġa fuq il-mejda tal-kamra kopja tal-kontijiet awditjati tal-Partit Nazzjonalista tal-2018, meta għall-ewwel darba l-Partit kellu jikkonferma li għal snin twal it-tmexxija tiegħu ġabret il-bolol tal-ħaddiema tagħha, imma ma għaddithomx lill-Kummissarju tat-Taxxa.
Huwa rrefera għal nota 19.2 f’paġna 25 tal-kontijiet għall-2018 sottomessi minn Dr Adrian Delia, li dakinhar kien Kap tal-Partit. Din tindika li fl-2017 il-Partit Nazzjonalista kellu jagħti lill-Gvern €267,344 f’bolol tal-ħaddiema u taxxi miġbura mingħandhom.
Dan filwaqt li f’nota 19.1, jirriżulta li l-Partit Nazzjonalista kellu jagħti lill-Kummissarju tat-Taxxa €41,663 oħra f’bolol u taxxi tal-ħaddiema, u li dawk kienu dovuti dik is-sena stess.
B’kollox, għalhekk, l-ammont miġbur mill-ħaddiema imma li ma kienx mgħoddi lill-Kummissarju tat-Taxxa kien jammonta għal ftit aktar minn €309,00. Dan meta l-Partit Nazzjonalista kellu 19-il ħaddiem impjegati direttament miegħu li f’sena kienu dovuti jħallsu mal-€31,000 f’bolol.
Dan jimplika li l-Partit Nazzjonalista fl-2017 kellu dovuti l-ekwivalenti ta’ għaxar snin bolol li kien ġabar minn fuq il-ħaddiema tiegħu stess.
Ta’ min jinnota li dawn il-pendenzi ma jkoprux il-Medialink u kumpaniji oħra li jgħajtu lill-Partit Nazzjo¬nalista, u li ma hemmx informazzjoni pubblika jekk kinux qed jagħmlu bħad-Dar Ċentrali u ¬jieħdu l-bolla u t-taxxa mill-ħaddiema imma ma jgħadduhiex lill-Kummissarju tat-Taxxi.
Il-Prim Ministru rrimarka li mhux magħruf x’ġara wara, fl-aħħar erba’ snin, għax mindu sar Kap Bernard Grech, dan qatt ma ppubblika kontijiet għal sena sħiħa ta’ tmexxija.
Filwaqt li sejjaħ dan kollu bħala aġir immorali mit-tmexxija tal-Oppożizzjoni, Dr Abela serraħ moħħ il-ħaddiema tal-Partit Nazzjonalista li l-Gvern se jkun qed jagħmel tajjeb għall-bolol tagħhom – li qed jitteħdulhom imma mhux jgħaddu lid-Dipartiment tat-Taxxa. Jekk ma jsirx hekk, dan ifisser li dawn il-ħaddiema jispiċċaw bi problemi fil-pensjoni tagħhom, billi jew jieħdu pensjoni mnaqqsa, jew saħansitra ma jikkwalifikawx għal waħda. Tali problemi jispiċċaw ibatu minnhom anke r-romol ta’ dawn il-ħaddiema.
Filwaqt li qal li t-taxxi tal-poplu se jkollhom jagħmlu tajjeb għal dan in-nuqqas finanzjarju tat-tmexxija tal-Partit Nazzjonalista, Dr Abela ħeġġeġ lill-awtoritajiet kompetenti biex iwaqqfu dan l-abbuż, li huwa sejjaħ miżapproprjazzjoni ta’ flus ħaddieħor, u li jikkostitwixxi f’reat kriminali.
Imma l-Prim Ministru għamilha ċara li fl-ebda ħin ma jistgħu dawk li jmexxu lill-Partit Nazzjonalista jaħsbu li l-Gvern ser jidħol biex jagħmel tajjeb ukoll għad-dejn taċ-ċedoli introdott minn Dr Simon Busuttil.
Dan hekk kif il-Prim Ministru żvela li s-sena d-dieħla l-Partit Nazzjonalista jrid iħallas lura dejn ta’ sitt miljun ewro f’ċedoli. Dawn iċ-ċedoli kienu maħsuba minn Dr Busuttil biex idur mal-liġi tal-finanzjament tal-partiti u jippermetti li persuni anonimi jgħaddu eluf ta’ ewro lill-Partit Nazzjonalista biex dan jiffinanzja l-isplużjoni tal-ispejjeż tiegħu.
Il-kontijiet pubbliċi tal-Partit Nazzjonalista juru li bejn l-2016 u l-2020, l-ispiża tal-Partit żdiedet minn €1.1 miljun għal €1.4 miljun, jew b’madwar 30%.
Mhux magħruf kemm din baqgħet tiżdied fl-erba’ snin ta’ wara, għax taħt Bernard Grech, il-Partit beda jikser il-liġi tal-finanzjament tal-Partiti u kompla jagħmel hekk anke meta ffaċċjat kemm-il darba mill-awtoritajiet.
