Peter Fenech, il-President tal-Kamra tal-Avukati kien skomdu u evażiv meta mistoqsi minn ONE News dwar kif inkitbet l-istqarrija tal-Kamra tal-Avukati – u jekk ikkonsultax mal-avukati esperti fil-kriminal qabel inħarġet.
Dan fid-dawl tal-fatt li kien hemm avukati speċjalizzati fil-kamp kriminali, membri tal-Kamra, li pubblikament esprimew ruħhom fuq il-ħtieġa ta’ riforma fil-qasam.
Ġurnalist: “Dwar l-istqarrija li nħarġet mill-Kamra tal-Avukati relatata mar-riformi, l-istqarrija finali biex niftehmu. Dik kif kienet issuġġerita mill-avukati membri li jispeċjalizzaw fil-qasam kriminali.”
Peter Fenech: “Le, le. Iċ-Chamber ħarġet stqarrija li hija pubblika ta’ nhar is-Sibt li għadda”.
Mistoqsi minn ONE News biex jikkarifika, Fenech sostna li, filwaqt li l-Kamra damet aktar minn ġimgħa biex ħarġet l-istqarrija, imbagħad, hu ħareġ verżjoni li, skont hu, kien jidhirlu li qed tirrifletti l-opinjoni ta’ min kienu kkonsultaw.
“Għax ikkonsultat ma’ ħafna u ħafna avukati u ħadna l-fehma ta’ dak li dehrilna kienet id-direzzjoni ta’ dawk li kkonsultajna.”
Peter Fenech, President, Kamra tal-Avukati
Dan filwaqt li, meta erġajna nipprovaw niċċaraw iżjed, l-Avukat Fenech qalilna li ma jixtieqx jirrispondi u li huma jikkonsultaw ma’ min jidhrilhom.
Peter Fenech: “Mhix kwistjoni ta’ parir, diġà rrispondejtek, jiġifieri dik hi l-pożizzjoni li ħarġet il-Kamra, sempliċi, mhemmx fejn tintilef.”
Ġurnalist: “U huwa dak l-ispeċjalisti fil-qasam kriminali, le?”
Peter Fenech: “Jien mhux hekk għedtlek. Dak qed tgħidu inti.”
Ġurnalist: “Le, le. Jiġifieri dak li ssuġġerew…
Peter Fenech: “Jiena mhux se nirrispondi. Ma nagħmlu l-ebda differenza bejn avukati li jispeċjalizzaw hawn u li jispeċjalizzaw hemm. Aħna nikkonsultaw lil kull min jidhrilna li għandna nikkonsultaw.”
Fi stqarrija, is-Sibt, il-Kamra tal-Avukati ddeskriviet it-tibdil propost mir-riforma bħala “mhux aċċettabbli” u li, skontha, l-emendi proposti jorbtu idejn il-ġudikatura u ċ-ċittadini.
Dan minkejja li r-riforma żżid aktar drittijiet għaċ-ċittadini, tirresponsabbilizza l-użu tal-inkjesta u televaha għal-livell ta’ mħallef.
L-istess stqarrija argumentat li mhuwiex fl-interess tal-ġustizzja li inkjesta tingħata terminu ta’ skadenza u ddefendiet wkoll il-kunċett ta’ “hearsay evidence”, bħala evidenza ammissibbli.
Fuq il-proposti dwar ir-rwol tal-esperti, il-Kamra tal-Avukati qalet li tara diffikultà fl-abbozz tal-Gvern.
Dan meta l-intenzjoni tar-riforma hu dak li tassigura li ma jkunx hemm abbozzi mill-esperti mqabbdin mill-Qorti u dan b’reazzjoni għal kontroversji legali li qed jirriżultaw fil-Qorti, inkluż bl-inkarigu li ngħata Jeremy Harbinson, fl-inkjesta tal-isptarijiet.
Dan l-espert għandu jirrappreżentah lil ħadd ħlief, l-Avukat Peter Fenech. Harbinson ta’ kuljum qed jissemma fl-aħbarijiet minħabba l-fatt li qed jirrifjuta li jixhed f’inkjesta li swiet lill-pajjiż €11-il miljun.
