Żagħżugħ ta’ 24 sena mill-Imtarfa, li kien qed isuq BMW, tilef ħajtu u passiġġier ta’ 23 sena, li kien miegħu, iddaħħal l-Isptar Mater Dei għall-kura wara li kienu involuti f’aċċident qrib il-mini ta’ Ħal Kirkop fl-akkwati tal-Ajruport Internazzjonali ta’ Malta għall-ħabta tad-9:15 ta’ bil-lejl.
Mill-ewwel indikazzjonijiet f’idejn ONE News, jidher li ma kienx hemm vetturi oħrajn involuti.
Kienu membri tad-Dipartiment tal-Protezzjoni Ċivili li taw l-ewwel għajnuna, peress li telefonata fuq il-112 kienet tindika li kien hemm xi persuni maqbudin f’karozza. Fuq il-post waslu wkoll ħaddiema tal-Emerġenza, li ċċertifikaw il-vittma mejjet fuq il-post, waqt li l-passiġġier ittieħed lejn l-Isptar bl-ambulanza fejn jingħad li kien f’qagħda stabbli.
Il-Pulizija qed jinvestigaw, waqt li ġie informat il-Maġistrat Joe Mifsud, li ħatar inkjesta u l-esperti Dr Mario Buttigieg, il-Perit Robert Musumeci u l-espert mediku Edward Cherubino biex jassistuh.
