Fis-sit tal-aħbarijiet tal-Partit Nazzjonalista dan l-aħħar inkitbet opinjoni li ma setgħetx ingħatat titlu aħjar: “Id-diżonestà fil-politika.” Fil-kitba tiegħu l-opinjonista Mark Said jgħid “Il-fanatiċi politiċi wkoll huma diżonesti peress li jagħmlu bil-konvinzjoni li huma assolutament dejjem għandhom raġun f’kollox. Ikunu inflessibbli u bla emozzjonijiet, bħal romblu lest li jgħaffeġ kulma jsib quddiemu. B’kuntrast, il-politiċi opportunisti mhumiex inqas diżonesti għaliex ma jkollhom ebda idea ta’ viżjoni. Ikunu bla spina, ma jħaddnu ebda prinċipji u jaħarbu minn kull responsabbiltà.”
Paragrafu li jiddeskrivi b’mod tajjeb ħafna dak li qed ngħixu llum il-ġurnata fil-politika mħaddna mill-Partit Nazzjonalista. Il-politika li qed toħroġ mill-kamp Nazzjonalista, mhux biss dawk li huma parti minnu, imma wkoll dawk li jappoġġjaw b’għamad politiku lill-partit fl-Oppożizzjoni.
Il-PN huwa mmexxi minn fanatiċi politiċi li l-konvinzjoni tagħhom hija li huwa biss il-Partit Nazzjonalista li għandu d-dritt sagrosant li jiggverna lil pajjiżna. Aktar milli l-partit, dawn jemmnu b’mod fanatiku, li huma biss għandhom id-dritt sagrosant li mhux biss imexxu lill-PN, imma wkoll li meta dan ikun fil-gvern, jiddettaw il-politika tiegħu.
Dawn il-fanatiċi huma dawk magħrufin aħjar bħala l-estremisti li jmexxu u jiddettaw dak kollu li joħroġ mill-Oppożizzjoni.
Din tal-estremisti ilha tweġġa’ lil tal-PN. Il-kap attwali ma jniżżilha bl-ebda mod li hemm ponn nies li qed imexxuh minn imnieħru, tant li minn żmien għal żmien jipprova mingħajr suċċess, jiċħad din il-verità. Tant mhux qed jirnexxilu, li dawk il-ġurnali u siti tal-aħbarijiet li jappoġġjaw lill-PN, provaw u għadhom jipprovaw jilagħbu l-logħba tiegħu. Fil-fatt ftit jiem ilu kien imiss lill-ġurnal The Malta Independent on Sunday li jippubblika artiklu b’diversi kliem li sejjaħ ‘buzzwords’ u prova jwaħħad dawn mal-Partit Laburista. Fost il-kliem li dan l-artiklu għażel hemm proprju l-“establishment.”
Skont dan l-artiklu, hija biss invenzjoni tal-Partit Laburista li huwa l-establishment li jmexxi l-PN. Kemm din hija ’l bogħod mill-verità, jgħiduha esponenti stess tal-PN, bl-iktar voċiferu dwarha Adrian Delia, li jaf sew sa fejn iwassal l-establishment. Kienu dawn li mexxew il-kampanja antidemokratika li rnexxiet, biex qalftuh ’il barra minn kap tal-partit.
Wieħed li sa ftit tal-ġimgħat ilu kien jipprova jinħeba fil-kwinti, mingħajr suċċess, u huwa parti minn dan l-establishment huwa Simon Busuttil, l-eks kap politikament fallut tal-PN. Kap li ttanta jmexxi l-Partit Nazzjonalista għal rebħa elettorali, imma b’inkompetenza politika għall-aħħar, għadda lill-PN mill-akbar telfa elettorali li qatt kellu.
Dan huwa l-istess Simon Busuttil li fl-1999 kien inħatar mill-Gvern Nazzjonalista bħala Kap taċ-Ċentru ta’ Informazzjoni Malta-UE (MIC) u mexxa l-kampanja ta’ għarfien pubbliku ta’ Malta qabel ir-referendum tal-2003 dwar is-sħubija fl-UE. Simon Busuttil tal-Europa Consultancy li kien ingħata mal- €1.2 miljun f’konsulenzi mill-Gvern tal-PN.
Meta kien imexxi ċ-Ċentru Informazzjoni Malta Unjoni Ewropea, Simon Busuttil ta konsulenzi lill-kumpanija Europea Research & Consultancy Services (ERCS). Kien sieħeb f’din il-kumpanija, li matul is-snin baqgħet tieħu għadd kbir ta’ konsulenzi mingħand gvernijiet Nazzjonalisti. Din l-informazzjoni kienet ħarġet fl-2016 meta kienet qed titwieġeb mistoqsija parlamentari, bir-risposta tikxef kif fost il-konsulenti mħallsa li kellu Busuttil, kien hemm Daphne Caruana Galizia. Il-konsulenza li ngħatat lil din il-kumpanija kienet marbuta mal-oqsma tal-inbid u l-ħut u bħal fil-każ Caruana Galizia, mhux magħruf jekk din ingħatatx b’direct order jew sejħa għall-offerti.
Fl-2014 dan kien is-suġġett ta’ xandira politika li kien għamel il-Partit Laburista. Simon Busuttil kien tbekka u qal li ħassu malafamat, għamel kawża ta’ libell kontra l-PL, imma tilifha. Il-Qorti kkonfermat li Simon Busuttil kien jagħmel parti mill-kumpanija Europa Research and Consultancy Limited u li din ħadet miljun u nofs ewro f’kuntratti u direct orders fosthom konsulenzi.
Dan huwa Simon Busuttil li huwa parti mill-establishment tal-Partit Nazzjonalista. Simon Busuttil li jħobb biss is-sewwa, is-sewwa biss u xejn inqas mis-sewwa, sakemm dan isir f’dar ħaddieħor.
Simon Busuttil ilu midħla tal-politika fil-kamp politiku Nazzjonalista minn meta kien President tal-Istudenti Demokristjani Maltin bejn l-1989 u l-1991. Fl-1999 kien inħatar mill-Gvern Nazzjonalista bħala Kap taċ-Ċentru ta’ Informazzjoni Malta-UE (MIC). Fl-2004 ġie elett bħala Ewroparlamentari f’isem il-Partit Nazzjonalista u reġa’ ġie elett fl-2009. Żewġ elezzjonijiet li ħareġ bħala kandidat għall-Ewropa meta l-PN kien immexxi minn Lawrence Gonzi, żmien li huwa magħruf bħala l-Gvern ta’ GonziPN.
Għalhekk hija stramba kif dan l-aħħar Simon Busuttil qal li huwa qatt ma kien parti minn dak il-Gvern Nazzjonalista, immexxi minn Lawrence Gonzi. Amministrazzjoni li tibqa’ magħrufa bħala waħda mill-agħar jekk mhux l-agħar waħda ta’ pajjiżna.
Nesa Simon Busuttil li ftaħar kemm-il darba li kien l-awtur tal-programmi elettorali Nazzjonalisti fosthom tal-2008 meta l-PN kellu bħala kap lil Lawrence Gonzi. Persuna li tikteb il-programm elettorali ta’ partit, bilfors ikollha kuntatt mal-kap ta’ dak il-partit! Imma Busuttil qed jiċħad is-sewwa magħruf.
Simon Busuttil, li bħal ta’ madwaru, huwa diżonest politikament f’dak li jgħid u jagħmel. Ftit tal-jiem biss wara li, f’attività tal-fergħa estremista Nazzjonalista, qal li l-Partit Laburista qed jilqa’ fih il-kriminali, meta kien qed jiġi intervistat waqt podcast ta’ Karl Bonaci, Busuttil qal li jħobb lil-Laburisti.
Li ma jistax jiċħad Busuttil huwa s-sehem kbir tiegħu fl-establishment tal-PN. Fl-aħħar ġimgħat, l-eks Kap Nazzjonalista Simon Busuttil, li huwa fiċ-ċentru tal-klikka estrema tal-Partit Nazzjonalista ngħata ħafna promozzjoni mill-partit li kien imexxi. Din id-darba mhux qed jipprova jaħdem minn wara l-kwinti, imma fid-deher.
Il-klikka estremista fi ħdan il-PN, li tinkludi, fost l-oħrajn, lid-Deputati Karol Aquilina, Beppe Fenech Adami, David Casa u Claudette Buttigieg, komplew saħħew il-kuntatti tagħhom ma’ Simon Busuttil. Manuvri li qed jaraw lil Busuttil jaqsam magħhom u mal-grupp Repubblika ta’ Robert Aquilina, li huwa n-nutar tal-Kurja u ħu d-Deputat Karol Aquilina, ħsibijiet u pariri dwar kampanji kontra membri tal-Gvern
Imma Simon Busuttil iħobbhom lil-Laburisti. Is-sehem ta’ Busuttil kien skala fl-2019 meta fi ħdan il-PN kien hemm skumdità kbira wara li l-grupp ta’ deputati li jsejħu lilhom infushom bħala l-Eroj il-Blu, bdew jużaw lil Busuttil biex ikomplu jżidu l-kontroll fuq il-Kap attwali tal-Partit Nazzjonalista, Bernard Grech. Simon Busuttil beda jkun ukoll aktar viżibbli fil-midja, sitwazzjoni li wasslet għal aktar skumdità għal Bernard Grech għax din kienet sitwazzjoni li kompliet timmina r-relevanza tiegħu, issa fil-beraħ.
Skumdità li trid tintrabat mar-rikatt li hemm fuq Bernard Grech. Rikatt li kien sarlu pubblikament minn Manuel Delia, dak li kien Kap tas-Segretarjat tal-eks Ministru Austin Gatt u li jibqa’ magħruf għall-fjask tal-Arriva. Ftit minuti wara li Grech warrab lil Adrian Delia u beda jmexxi lill-PN, Delia kien kiteb lil Bernard Grech biex ma jgħaxxaqhiex għax inkella malajr isibu lil ħaddieħor.
Simon Busuttil li anki ħoloq skumdità fil-Partit Popolari Ewropew, b’numru ta’ membri parlamentari Ewropej tal-PPE juru b’mod ċar li kienu urtati u rrabjati bid-deċiżjoni tal-ħabib tal-PN Manfred Weber, li kien il-kap tal-PPE, li qabad u għażel lil Simon Busuttil bħala segretarju ġenerali.
Busuttil minn dejjem ħoloq mewġ f’pajjiżna. Mewġ ta’ telfiet elettorali għall-Partit Nazzjonalista, u mewġ ta’ skumdità ma’ kull fejn imiss b’idejh. Bħala persuna ċentrali tal-estremisti, Busuttil qed joħloq mewġ li jista’ jkollhom riperkussjonijiet anki fuq is-serenità politika ta’ pajjiżna.
