Bl-aktar mod meritat għalkemm bi skor strett Hamrun Spartans għelbu l-isfida ta’ Hibernians bl-iskor ta’ 2-1, bil-goals għalihom jaslu wieħed f’kull taqsima. Kienet partita li fiha Hamrun iddominaw għal ħinijiet twal l-avversarji tagħhom bl-iskor li seta’ saħansitra kien ikbar favurihom li kieku kienu iktar preċżi fl-attakk u daħkitilehom iktar il-fortuna.
Għal Hamrun irritorna fl-azzjoni fil-qalba tad-difiża il-player Brażiljan li fil-jiem li għaddew applika għaċ-ċittadinanza Maltija, Emerson Marcelina.
Hamrun għamlu l-intenzjonijiet tagħhom ċari mal-ftuħ tal-partita u mal-kwarta loghob fetħu l-iskor meta RAPHAEL LOPES SILVA approfitta minn indeciżjoni fid-difiża ta’ Hibernians minn Jurgen Degabriele li niżel biex jgħin lil sħabu, u mill-viċin b’logħob tat-tfal tefa’ ġewwa biex kompla jikkulmina bidu ta’ sena kalendarja 2025 mill-aqwa.
Huma komplew jiddettaw il-logħob u fid-29 minuta, Lui Talison Barbosa, kellu x-xutt fil-baxx tieghu li rriżulta bħala kemmxejn fraġli li ftit li xejn impenja lill-goalkeeper tal-Pawlisti Hugo Sacco li salva minn mal-art.
Kulma jmur kompla d-dominju assolut tal-Ispartans u fis-36 minuta Ryan Camenzuli ttanta xortih permezz ta’ xutt mill-ewwl mid-distanza li għadda jħakkek ma’ sieq il-wieqfa, b’Hibernians jeħilsuha ħafif.
Huma komplew jippressaw u fit-43 minuta Lui Talison Barbosa kellu x-xutt b’saħħtu tiegħu li ħareġ l-aħjar ta’ Sacco li dawwar f’corner b’mod stupend.
L-assedju fuq il-lasti tal-Pawlisti mill-Ħamruniżi kompla kulma jmur il-ħin u minuta biss wara Lopes Silva mill-viċin ra lil Sacco jsalva b’diffikultá f’żewġ tentattivi.
Fil-ftuħ tat-tieni taqsima Hamrun komplew fejn ħallew fl-ewwel waħda u fl-54 minuta rebħu penalty meta Sacco fit-tentattiv li jinterċetta l-ballun waqqa’ lil Lui Talison Barbosa fil-kaxxa. Mill-11-il metru inkariga ruħu l-ispeċjalista LUKE MONTEBELLO li ma żbaljax hekk kif permezz ta’ xutt b’saħħtu fil-baxx tefa’ l-ballun naħa u lil Sacco n-naħa opposta.
Iżda kontra x-xejra tal-logħob u proprju fl-ewwel azzjoni perikoluża li ħolqu l-Pawlisti fil-partita fit-63 minuta huma naqqsu l-marġni tal-iskor meta wara li rċieva minn azzjoni ta’ corner, l-attakkant Arġentin FEDERICO FALCONE kien fil-post it-tajjeb fil-mument opportun u mill-viċin b’xamma kbira għall-goal tefa’ ġewwa.
Dan il-goal kiesaħ u biered ġiegħel lill-Ħamruniżi jwettqu reazzjoni u hekk għamlu meta fil-71 minuta l-awtur tal-ewwel goal u l-Player tal-Logħba, Raphael Lopes Silva, evita d-daħla ta’ difesuur avversarju, u b’xutt fil-baxx minn pożizzjoni ideali kellu t-tentattiv tiegħu jistampa ma’ sieq il-wieqfa.
Huma komplew jamministraw il-vantaġġ minimu li kellhom sa tmiem il-partita.
Referee: Malcolm Spiteri
Plejer tal-Logħba – Raphael Lopes Silva (Hamrun S.)
