Hamrun Spartans, kif kien mistenni, kisbu rebħa konvinċenti fuq it-team mic-Challenge League Swieqi United, biex kisbu post ma’ l-aħħar 16 fil-kompetizzjoni.
Swieqi żammew l-iskor baxx fl-ewwel taqsima tant li sofrew goal wieħed biss, imma wara l-mistrieħ Hamrun ixxalaw biex rebħu faċilment.
Għalkemm kellhom l-aktar mil-logħob, Hamrun kellhom jistennew aktar minn nofs siegħa sabiex jiżblukkaw ir-riżultat b’goal uniku fl-ewwel taqsima li wasal fil-31 minuta meta Jovan Cardenovic qassam lil Talison Barboza li b’xutt b’saħħtu għar-rokna għeleb għal kollox lill-goalkeeper Jean Claude Debattista.
Qabel wasal dan il-goal, Hamrun qatt ma kienu perikolużi bi Swieqi joffru sfida denja lill-avversarji tagħhom.
Fis-36 minuta Hamrun kellhom azzjoni oħra bix-xutt ta’ Daniel Letherby jgħaddi ftit barra.
Fit-tieni taqsima l-Ispartans ma damux ma kabbru l-vantaġġ, eżattament fit-48 minuta, meta Raphael Lopes Silva qabad lill-goalkeeper Debattista barra minn post u b’lob preċiż ma falliex.
Tliet minuti wara l-istess Debattista interċetta tajjeb xutt ta’ Amoustapha Abdoul Kainou, waqt li n-naħa l-oħra fil-55 minuta Blessing Brafo għal Swieqi ttanta xortiħ b’xutt li l-goalkeeper Da Paz salva tajjeb.
Hamrun komplew ikabbru l-iskor fl-64 minuta Amoustapha Abdul Kainou, li kien qed jiddebutta għalihom, temm azzjoni personali b’xutt li għeleb lil Debattista.
Fis-76 minuta Hamrun għamluhom 4-0 meta kien Joseph Mbong li antiċipa l-ħarġa tal-goalkeeper Debattista u tefa’ l-ballun fix-xibka minn cross ta’ Luke Montebello.
Hamrun żiedu goal ieħor fl-84 minuta meta Ryan Camenzuli għadda ballun tajjeb lil Raphael Lopes Silva li skorja b’xutt fil-baxx għar-rokna.
Referee: Daniel Casha
