Mill-Ħamis 9 ta’ Jannar, ONE se jkun qed iwassal it-tieni drama tiegħu fl-iskeda l-ġdida li bdiet fl-ewwel jiem ta’ Jannar. Is-sensiela PREZZ L-IMĦABBA hija storja ambjentata fis-snin 60 u 70 u se tibda tixxandar kull nhar ta’ Ħamis, fid-9:15pm wara l-programm ta’ Clare Agius, The Local Traveller.
Fl-ewwel episodju se naraw lil Omm Grezzju li fl-aħħar siegħat ta’ ħajjitha tgħidlu xi ħaġa li qatt ma basar li se tgħidlu. B’din l-aħbar, Grezzju jibda l-missjoni tiegħu. Imma x’missjoni hi?
Naraw lil Ronnie, li jispiċċa jitlaq mid-dar għax l-imħabba li għandu għal Francesca, għamietu! Imma Francesca weġġgħatu u weġġgħatu ħafna. Għaliex? Konsegwenza ta’ din l-imħabba, Ronnie jispiċċa jbati l-konsegwenzi u jbatihom sew!
Fl-istorja nsibu wkoll lis-sinjura Karmni. Din ikollha tifel wieħed; Dovik. Is-sinjura Karmni kollox idejjaqha u tagħha biss tajjeb u għalhekk iżjed ‘il quddiem fl-istorja se niskopru dwar xi ħaġa li ddejjaqha ħafna fir-raħal.
PREZZ L-IMĦABBA jixxandar il-Ħamis fid-9:15pm fuq ONE
