Balzan dawwru telfa f’rebħa u evitaw l-aħħar post tal-klassifika fi tmiem l-ewwel round tal-kampjonat biex huma Naxxar Lions li spiċċaw fl-aħħar post b’din it-telfa.
Naxxar kienu l-aħjar tim matul l-ewwel taqsima u kien jimmeritahom imorru jistrieħu fil-vantaġġ. Iżda fit-tieni taqsima l-istorja kienet għal kollox differenti bit-tim ta’ Balzan jiddomina u jdawwar ir-riżultat favur tiegħu.
Naxxar fetħu l-iskor fl-ewwel azzjoni denja li ħolqu fis-17-il minuta meta Neil Pace Cocks fajjar xutt minn barra l-kaxxa li għeleb għal kollox lill-goalkeeper Dylan Ciappara u spiċċa fir-rokna tax-xibka.
Fl-24 minuta l-Lions reġgħu resqu qrib imma Jno-Baptiste ixxuttja barra mill-qrib minn kross ta’ Degran Jackson.
Balzan ħolqu l-ewwel u l-unika azzjoni fl-ewwel taqsima fis-27 minuta permezz ta’ xutt mill-bogħod ta’ Rafael Da Silva li spiċċa ftit għoli.
Fit-30 minuta corner mogħti minn Pace Cocks wasal għand Vitor Gualberto li bir-ras xeħet għoli mill-qrib.
Fis-37 minuta reġa’ kien Pace Cocks li nkariga ruħu minn korner li ġie kklerjat b’diffikulta’ mill-goalkeeper Ciappara.
Balzan ħarġu aktar aggressivi fit-tieni taqsima u skurjaw il-goal tad-draw fid-49 minuta meta Victor Blasco ħasad lill-goalkeeper Matthias Debono direttament minn freekick.
Fis-56 minuta Naxxar kellhom ċans tajjeb li jerġgħu jmorru fil-vantaġġ imma Edson Farias Cerqueira xeħet barra bir-ras mill-qrib minn cross ta’ Degran Jackson.
Madankollu kienu Balzan li issa bdew juru l-aħjar logħob u fil-61 minuta saħansitra marru fil-vantaġġ meta Jan Busuttil Qassam lil Dimeji Awosanja li minn pozizzjoni ideali spara xutt fil-baxx għar-rokna tax-xibka.
Balzan kellhom fejn iżidu l-vantaġġ fil-71 minuta iżda Henri Stanic temm azzjoni konfuża fil-kaxxa tal-Lions b’xutt mill-qrib li spiċċa barra.
Fis-76 minuta il-goalkeeper Debono mblokka xutt mill-qrib ta’ Nicholas Pulis waqt li minuta wara kien Udoyen Akpan, dejjem għal Balzan, li falla li jiskorja mill-qrib bir-ras.
Ċans ieħor għal Balzan wasal fis-86 minuta iżda azzjoni personali ta’ Dimeji Awosanja ntemmet b’xutt li għadda ftit barra.
Fil-ħin miżjud, Neil Pace Cocks kellu tentattiv jgħaddi ftit barra għal Naxxar.
Referee: Matthew Degabrielle
Plejer tal-Logħba: Victor Blasco (Balzan)
