Tħabbru d-dettalji tal-kunċert annwali u tradizzjonali ta’ Lejlet il-Milied mill-Malta Police Pipe Band, li qed jingħata l-isem ‘Winter Wonderland Spectacular’.
Stqarrija mill-Pulizija qalet li dan il-kunċert se jkun jieħu lill-udjenza fi vjaġġ maġiku u spettakolari għal dan iż-żmien tas-sena, imżewwaq bl-għanijiet klassiċi tal-Milied.
Il-kunċert, li se jsir fi Pjazza Teatru Rjal, il-Belt Valletta mis-sitta ta’ filgħxija ’l quddiem, se jara l-orkestra taħt id-direzzjoni tad-Direttur tal-Banda, Maestro Anthony Cassar, tinterpreta għanjiet popolari flimkien ma’ għadd ta’ kantanti u mużiċisti lokali, fosthom Mark Tonna, Kristy Spiteri, Neville Refalo, Nicole Hammett u David
Joseph Sammut.
‘Winter Wonderland Spectacular’ qed jittella’ bil-kollaborazzjoni ta’ Festivals Malta u Pjazza Teatru Rjali. Il-booking jista’ jsir fuq is-sit www.showshappening.com.
