Fil-konfront bejn Marsaxlokk u Naxxar L. irrenja bilanċ assolut hekk kif huma temmew il-konfront ta’ bejniethom fi draw ġust ta’ 1-1, biż-żewġ timijiet ikollhom il-waqtiet pożittivi tagħhom għall-ħinijiet differenti tul id-90 minuta.
Qabel il-partita il-player ta’ Marsaxlokk, Yuri De Jesus Messias ingħata rikonoxximent bħala l-MVP ta’ Novembru.
Din kienet partita speċjali għall-kowċ ta’ Marsaxlokk, Vincenzo Potenza, hekk kif kienet il-100 logħba tiegħu fil-Malta Premier.
Kienu Naxxar li ħolqu l-ewwel periklu fl-10 minuta meta xutt ta’ Francis Jno-Baptiste għadda ftit barra.
Marsaxlokk wieġbu sitt minuti wara permezz ta’ daqqa ta’ ras mill-viċin ta’ Alex De Aguilar Gomes għax-Xlukkjari li għaddiet ftit barra.
Fis-37 minuta, xutt minn ġol-kaxxa tal-istess Alex De Aguilar Gomes dejjem għal Marsaxlokk ġie mdawwar f’corner bi bravura minn Debono.
Marsaxlokk komplew jiddettaw il-logħob u sitt minuti wara Yuri De Jesus Messias kellu xutt mid-distanza li intemm għoli.
Fil-ftuħ tat-tieni taqsima, Marsaxlokk komplew fejn ħallew fi tmiem l-ewwel waħda u fid-49 minuta, Yuri De Jesus Messias kellu t-tentaiv tiegħu mill-viċin li ntemm ftit għoli.
Iżda kontra x-xejra tal-logħob kienu Naxxar li fetħu l-iskor fil-55 minuta meta ż-żagħżugħ KAYNE HABER li kien ilu biss disa’ minuti fil-ground, approfitta minn nuqqas ta’ komunikazzjoni bejn il-goalkeeper Marko Drobnjak u difensur ta’ Naxxar, u mill-viċin tefa’ ġewwa.
Iżda Marsaxlokk ma rmewx ix-xugaman anzi wettqu reazzjoni mill-aqwa u fit-63 minuta ġabu l-iskor indaqs meta Jose Ulises Arias għadda tajjeb lejn JAI QUITONGO li mill-viċin tefa’ l-ballun f’lasta vojta.
Huma komplew jipproduċu l-isbaħ logħob u fis-77 minuta Yuri De Jesus Messias ittanta xortih permezz ta’ lob delizzjuż mid-distanza li iżda ntemm ftit għoli.
L-iskor baqa’ ma nbidilx sa tmiem il-partita, biż-żewġ timijiet jieħdu punt kull wieħed.
Referee: Fyodor Zammit
Plejer tal-Logħba: Yuri De Jesus Messias (Marsaxlokk)
