Dsatax-il persuna ġew onorati għall-ħidma tagħhom f’diversi oqsma f’Jum ir-Repubblika, waqt iċ-ċerimonja ta’ investitura ta’ Ġieħ ir-Repubblika, fis-Sala tal-Gran Kunsill fil-Palazz tal-Gran Mastru fil-Belt Valletta.
F’għeluq il-ħamsin sena mill-kisba tar-Repubblika, l-istoriku Dr Joseph F Grima u Dr Joseph Zarb Adami, li għal snin twal ta’ kontribut fil-qasam tal-anestesija, ingħataw il-grad ta’ uffiċjal fl-Ordni Nazzjonali tal-Mertu.
F’din iċ-ċerimonja ngħataw sitt midalji ta’ Membru fl-Ordni Nazzjonali tal-Mertu. Dawn ingħataw lil:
- Simone Attard – figura prominenti fir-riproduzzjoni assistita u fil-counselling tal-infertilità;
- L-attur Dr Narcy Calamatta;
- Il-Professur Daniel Massa – poeta Malti u studjuż tal-letteratura;
- Clarence L. Pace – kirurgu, li kien Direttur Ġenerali tas-Servizzi tal-Kura tas-Saħħa fil-Ministeru għas-Saħħa u bħalissa huwa l-Ambaxxatur Malti fil-Kroazja;
- Il-Professur Paul Pace, li huwa figura prominenti fl-Edukazzjoni għall-Iżvilupp Sostenibbli f’Malta; u
- Il-Professur Charles Scerri, li kien strumentali sabiex iżid l-għarfien fuq id-dimensja.
Dan filwaqt li l-Kmandant Amerikan Allen K. Harker ingħata midalja bħala Membru Onorarju fl-Ordni Nazzjonali tal-Mertu.
F’din iċ-ċerimonja, sitt persuni oħra ngħataw Midalja għall-Qadi tar-Repubblika. Dawn huma:
- l-eks xandar u ġurnalista Reno Bugeja;
- l-eks Direttur Ġenerali tal-Assoċjazzjoni Maltija ta’ Min Iħaddem, l-MEA, Joseph Farrugia;
- Fr Stephen Borg, Fr Joseph Formosa u Fr Mario Sant – tliet patrijiet li jgħinu lill-Maltin u Għawdxin li jkunu qed jiġu kkurati fir-Renju Unit;
- l-Arċisqof Emeritu George Anthony Frendo;
- l-artista Doris Micallef; u
- l-Akkademja Mediterranja għall-Istudju fid-Diplomazija, il-MEDAC.
Dan filwaqt li l-eks deputat Karl Gouder, Jake Vella u Lorenzo Vella, irċievew din il-midalja għall-Qadi tar-Repubblika wara mewthom.
Il-Professur Jane Somerville, kardjologa rinomata mir-Renju Unit, li għamlet kontribuzzjonijeit kbar fil-qasam tal-mard tal-qalb, irċeviet Midalja għall-Qadi tar-Repubblika fuq bażi onorarja.
