Kollox jinsab lest biex fi Pjazza San Ġorġ, 50 sena wara li Malta saret Repubblika, jittella’ spettaklu li jiċċelebra dan l-avveniment waqt li jimxi mal-medda tas-snin.
“Se nesebixxu t-talent Malti u Għawdxi kif ukoll naraw, il-Maltin x’jafu jagħmlu – ċelebrazzjonijiet li se jibqgħu msemmija saż-żminijiet li ġejjin. Irridu nirriflettu mhux biss fuq il-ħamsin sena li għaddew, imma fejn irridu nieħdu dan il-pajjiż – fejn irridu li Malta tkompli timxi ‘l quddiem. Li hu żgur li meta l-poplu Malti u Għawdxi jkun maqgħud, kull sfida kapaċi jegħliba.
Ministru Owen BonniciREKLAMSKROLLJA BIEX TKOMPLI
Iċ-Chairman ta’ Festivals Malta, Aaron Zahra, qal kif il-kampanja intensiva ta’ informazzjoni dwar dan il-jum storiku ħalliet il-frott mixtieq.
“Tliet ijiem ta’ festa fil-lokalità tal-Belt Valletta – fejn qegħdin, fil-pjazza San Ġorġ, fejn ħamsin sena ilu, Sir Anthony Mamo, bħala l-ewwel President tal-istat Malti, ħareġ mill-gallarija jsellem lill-pubbliku. Allura, dik kienet ir-raġuni li l-attivitajiet se jduru kollha kemm huma ma’ Pjazza San Ġorġ. Aktar milli se jiġu u jieħdu gost il-pubbliku, se jieħdu magħhom esperjenza mill-aktar sabiħa.”
Aaron Zahra, Chairman
Frans Agius, Kap Eżekuttiv tal-istess entità kulturali, tenna li, permezz ta’ dan l-avveniment, Festivals Malta tinsab impenjata li, minbarra li tiċċelebra l-50 anniversarju minn Malta Repubblika, tagħti pjattaforma biex jitwassal is-sinifikat ta’ dan il-jum tant importanti fl-istorja ta’ pajjiżna lill-poplu Malti u Għawdxi.
Iċ-Ċermen tal-Festi Ċelebrazzjonijiet Nazzjonali, Liam Gauci, qal li dan l-ispettaklu se jkun il-qofol ta’ kampanja edukattiva li ġiet varata ftit jiem ilu fl-okkażjoni tal-50 anniversarju tar-Repubblika, bis-sehem ta’ bosta individwi Maltin, Għawdxin u anke persuni li għamlu minn Malta d-dar tagħhom.
Dan filwaqt li se jitqassam ktieb speċjali fl-iskejjel biex iwassal għal għarfien ġdid dwar Malta Repubblika.
Fl-aħħar jiem ġiet imnedija wkoll kanzunetta uffiċjali bi kliem ta’ Joe Julian Farrugia u mużika ta’ Elton Zarb, bl-isem ta’ ‘Aħna Malta’, u fiha tiġbor uħud mill-aqwa talent lokali.
Waqt li t-tlett ijiem tal-avvenimenti huma b’xejn, wieħed irid jirriserva l-biljetti minn fuq is-sit showshappening.com.
