Hibernians irritornaw għar-rebħ meta kellhom jitħabtu biex għelbu lil Mosta 3-2 f’logħba li huma ddominaw għal ħinijiet twal u li bi ftit attenzjoni setgħu rebħuha b’marġini akbar.
Kienu Hibernians li ħolqu l-ewwel azzjoni, eżattament fil-5 minuta, meta xutt fil-baxx ta’ Jurgen Degabriele ġie salvat tajjeb mill-goalkeeper Mosti Sean Mintoff.
Fit-13-il minuta Mosta kienu għoddhom fetħu l-iskor meta xutt ta’ Zachary Brincat stampa mal-mimduda.
Iżda fis-26 minuta Hibernians fetħu l-iskor meta Jurgen Degabriele rċieva mingħand Kevin Fraga u bil-goalkeeper Mintoff barra minn postu Degabriele llobbja perfettament fix-xibka.
Hibernians rduppjaw fit-38 minuta meta reġa’ kien Fraga li għadda l-ballun lil Federico Falcone u dan fajjar xutt minn barra l-kaxxa li spiċċa fir-rokna tax-xibka.
Fl-40 minuta Giancarlo Goncalves temm azzjoni personali għal Mosta b’xutt li għadda ftit għoli.
Iżda l-aħjar ċans għal Mosta li jnaqqsu l-marġini wasal fil-45 minuta iżda Joshua Agyemang minn ħalq il-lasta xxuttja għoli.
Fit-tieni taqsima kienu Mosta li ħargu fuq l-attakk u fl-54 minuta huma naqqsu l-marġini meta minn corner mogħti minn Goncalves kien De Souza Teixeira li antiċipa l-ħarġa tal-goalkeeper Sanchez u bir-ras tefa’ l-ballun fix-xibka.
Iżda erba’ minuti biss wara Jurgen Degabriele skorja għal Hibernians minn azzjoni mibdija minn Kurt Shaw bix-xutt ta’ Degabriele jaħbat mal-mimduda qabel qabeż il-linja fatali minkejja t-tentattiv tal-goalkeeper Mintoff li jipprova jsalva.
Mosta ma ċedewx l-armi għal kollox u fit-72 minuta reġgħu naqqsu l-margini meta s-sostitut Stephen Gabriel Chimezie qabad lill-goalkeeper Sanchez barra minn postu u sab ix-xibka.
Kien baqa’ aktar minn kwarta għat-tmiem bil-Mostin jippruvaw isalvaw ir-riżultat imma Hibernians għarfu jiddefendu tajjeb biex ir-riżultat baqa’ ma nbidilx sat-tmiem.
Referee: Daniel Casha
Player tal-Loghba: Jurgen Degabriele (Hibernians)
