It-tliet timijiet li jinsabu fil-quċċata tal-kampjonat tal-Ewwel Diviżjoni tad-darts bdew bl-aqwa mod possibbli t-tieni round b’rebħiet tajbin kontra l-avversarji rispettivi tagħhom.
Floriana Ajax A għelbu lil Floriana Ajax B 7-1 filwaqt li Rosso 33 kisbu rebħa ta’ 5-3 kontra Ħamrun Bayern. Birgu Boċċi Club A irrispondew għar-riżultati tar-rivali tagħhom wara skor ta’ 5-3 kontra Sliema Lounge A.
Juventutis Domus kienu dominanti fuq Żejtun Laċċi Maypole tant li rebħu 7-1.
Fit-tieni diviżjoni, il-leaders Duke’s Darts Team ġew miżmuma fi draw ta’ 4-4 kontra Cox Bar sabiex issa l-vantaġġ tagħhom f’ras il-klassifika niżel għal punt biss.
Iż-żewġ timijiet ta’ warajhom iġifieri Żejtun Band Club u Birgu Boċċi B malajr approfittaw meta għelbu lil PO’s Bar (5-3) u Beland Bull’s Eye (8-0).
Top Gun Marsa kisbu rebħa tajba barra minn darhom għand Żejtun Laċċi Reds.
Fit-tielet diviżjoni, Titans tal-Balklor komplew isaħħu posthom fil-quċċata wara li komplew jirbħu. Huma għelbu lil Duke’s Darts Team B 7-1 sabiex għadhom igawdu vantaġġ ta’ tliet punti fuq Munchies li min-naħa tagħhom għelbu lil Żurrieq FC 7-1.
F’aktar logħbiet, Tal-Ġilju għelbu lil MMG Żabbar 6-2 filwaqt li Nicolo Isouard għelbu barra minn darhom lil Sliema Lounge B 5-3.
