F’partita ferm entużjażmanti u movimentata mill-bidu sat-tmiem, Marsaxlokk għelbu l-isfida ta’ Melita bl-iskor ta’ 3-1 fl-ewwel partita tal-Ħadd fil-Victor Tedesco Stadium
Kienu Melita li ħolqu l-ewwel periklu wara biss minuta meta Andre Carlos Penha da Costa dar mal-goalkeeper Serb ta’ Marsaxlokk, Marko Drobnjak, u żelaq qabel prova jikkonkludi, bil-ballun jintemm barra bl-azzjoni tisfuma fix-xejn.
Marsaxlokk wieġbu fit-12-il minuta meta Yuri De Jesus Messias ħarab tajjeb fuq ix-xellug qabel kellu x-xutt tiegħu jintemm barra.
Huma komplew jiddettaw il-logħob u fl-24 minuta freekick insidjuż ta’ Alex De Aguilar Gomes stampa mal-wieqfa, b’Melita jeħilsuha ħafif.
Melita reġgħu ħolqu l-periklu fit-28 minuta meta freekick insidjuż ta’ Alan Borg Olivier ġie mdawwar f’corner b’mod stupend minn Drobjnak.
Iżda kienu Marsaxlokk li fetħu l-iskor fis-37 minuta, meta wara li rċieva minn azzjoni t’ corner ta’ Yuri De Jesus Messias, LUCAS EMANUEL LOPEZ, kellu d-daqqa ta’ ras tiegħu mill-viċin li ntemmet ġewwa.
Dan sabiex żewġ minuti biss wara, huma kellhom f’saqajhom il-ballun tat-tieni goal meta Jai Quitongo xeħet through pass fid-direzzjoni ta’ Yuri De Jesus Messias li minn tarf il-kaxxa kellu ċ-ċans kollu biex jikkontrolla, u ttanta xortih permezz ta’ lob delizzjuz li iżda ntemm ftit għoli.
Fil-ftuħ tat-tieni taqsima, Marsaxlokk komplew fejn ħallew fi tmiem l-ewwel waħda u fit-52 minuta rduppjaw l-iskor meta l-ewwel xutt ta’ Jai Quitongo ġie mblukkat minn sieħbu stess, Jose Ulises Arias, bil-ballun jasal għand YURI DE JESUS MESSIAS li permezz ta’ xutt fil-baxx minn ġol-kaxxa spara l-ballun fir-rokna tax-xibka.
Iżda Melita ma rmewx ix-xugaman anzi wettqu reazzjoni mmedjata u erba’ minuti wara naqqsu l-marġni tal-iskor permezz ta’ xutt mill-isbaħ minn barra l-kaxxa ta’ ALAN BORG OLIVIER li ma ta l-ebda ċans lil Drobnjak.
Fl-64 minuta Marsaxlokk tilfu ċans li jkomplu jkabbru l-marġni tal-iskor meta Jai Quitongo kellu x-xutt tiegħu jiġi devjat minn difensur ta’ Melita qabel stampa mal-wieqfa u ntemm barra.
Melita wieġbu minuta biss wara meta Nick Cutajar xeħet cross lejn Andre Carlos Penha da Costa li kellu d-daqqa ta’ ras tiegħu tintemm ftit għoli.
Marsaxlokk għamluhom tlieta fit-68 minuta f’azzjoni kważi foto-kopja tal-ewwel goal, wara li rċieva minn corner mogħti mix-xellug minn Yuri De Jesus Messias, LUCAS LOPES SILVA, bir-ras mill-viċin ma ħafirx.
Il-partita kompliet ikkaratterizzta minn ħafna logħob f’nofs il-ground, bix-Xlukkjari jkomplu jamministraw il-vantaġġ doppju li kellhom sa tmiem il-partita.
Referee: Ezekiel Barbara
Plejer tal-Logħba: Jai Quitong (Marsaxlokk FC)
