Gżira United u Naxxar Lions temmew il-konfront ta’ bejnitehom fi draw ta’ 1-1, bi Gzira jiddominaw għal kollox l-ewwel taqsima, iżda fit-tieni taqsima Naxxar wettqu reazzjoni mill-aqwa u ta’ dan ġew ippremjati permezz tal-goal tad-draw.
Kollox ma’ kollox kienet logħba entużjażmanti u ta’ żewġt uċuh hekk kif iż-żewġ timijiet kellhom il-mumenti pożittivi tagħhom f’ħinijiet differenti fil-partita.
Kienu Gzira li ħarġu fuq l-offensiva u fl-10 minuta Luis Carlos Riascos kellu d-daqqa ta’ ras tiegħu minn taħt il-lasta tiġi salvata bi bravura minn fuq il-linja mill-goalkeeper żagħżugħ ta’ Naxxar, Matthias Debono. Huma komplew jiddettaw il-loghob u fit-23 minuta, Thiago Espindola ttanta xortih permezz ta’ xutt mid-distanza li iżda sab lil Debono attent hekk kif salva b’diffikultá.
Kulma jmur kompla d-dominju assolut tal-Maroons u fil-31 minuta Thaylor Aldama xeħet cross fil-baxx lejn Christian Saint Ebisindor li minn taħt il-lasta għamel l-impossibli u tefa’ inkredibilment għoli.
Fil-ftuħ tat-tieni taqsima, Gzira ħarġu ferm aggressivi u ta’ dan ġew ippremjati meta fil-51 minuta rebħu penalty. Mill-11-il metru inkariga ruħu l-ispeċjalista GABRIEL BOHRER MENTZ li ma żbaljax hekk kif permezz ta’ xutt b’saħħtu spara l-ballun fis-saqaf tax-xibka.
Iżda kontra x-xejra tal-logħob, fit-62 minuta Naxxar ġabu l-iskor indaqs permezz ta’ xutt mid-distanza ta’ EDSON CERQUEIRA FARIAS li ma ta l-ebda ċans lill- goalkeeper ta’ Gzira United, Justin Haber, b’dan ikun il-200 goal tal-istaġun fil-Malta Premier.
Dan il-goal ipprovda injezzjoni morali lin-Naxxarin, fejn bdew jersqu iktar lejn il-lasti avversarji u fis-76 minuta, il-Ġappuniż Ito Yasukaze kellu f’saqajh il-goal tar-rebħa iżda kellu t-tentattiv tiegħu permezz ta’ lob delizzjuż jiġi salvat minn Haber li kien barra minn postu iżda reġa’ lura f’postu u salva fil-ħin.
Fl-aħħar mumenti tal-partita, Gzira tefgħu kollox fuq l-attakk fit-tentattiv li jerġgħu jaqilbu l-iskor favurihom iżda sabu difiża ferm kumpatta u organizzata Naxxarija li annullat għal kollox l-attakki tagħhom.
L-iskor baqa’ ma nbidilx sa tmiem il-partita, biż-żewġ timijiet jieħdu punt kull wieħed.
Referee: Matthew Degabrielle
Plejer tal-Logħba: Gabriel Bohrer Mentz (Gzira United).
