Goal fl-94 minuta skurjat minn Jake Grech ta’ rebħa drammatika lil Floriana f’logħba ferm bilanċjata li baqgħet indeċiża sa l-aħħar suffara tar-referee Trustin Farrugia Cann.
Kienu Mosta li setgħu spiċċaw rebbieħa meta fit-92 minuta ngħataw penalty iżda Souleymane Kone, il-plejer li pprokura l-penalty, inkredibilment tefa’ l-ballun ferm għoli mill-11-il metru.
Mosta ħolqu l-ewwel periklu fl-10 minuta meta Sunday Okereke daħal fil-kaxxa imma minn qagħda xi ftit angolata xxuttja tul il-lasta.
Floriana wieġbu minuta wara b’azzjoni tajba fuq ix-xellug ta’ Nascimento Dos Santos li kkrossja għan-nofs imma Jake Grech minn qagħda ċentrali xxuttja dgħajjef u l-goalkeeper Udoh Akpan salva tajjeb.
Fit-18-il minuta reġgħu kienu Mosta li resqu qrib b’azzjoni bejn Prince Afriyie u Giancarlo Goncalves b’dan ta’ l-aħħar jixxuttja ftit barra.
Fis-27 minuta Floriana ħolqu l-aħjar azzjoni ta’ l-ewwel taqsima meta Alexandros Kouro temm azzjoni personali b’xutt sabiħ mill-bogħod li l-goalkeeper Akpan salva f’corner.
Qabel intemmet it-taqsima, fil-45 minuta, reġa’ kien Okereke għal Mosta li tefa’ cross għan-nofs imma ma sab lil ħadd min jikkonkludi.
Fit-tieni taqsima kienu Mosta li ħarġu fuq l-attakk u fid-49 minuta cross ta’ Okereke ġie kklerjat sa barra l-kaxxa fejn ix-xutt ta’ Afriyie ġie salvat f’corner mill-goalkeeper Mafoumbi.
Mal-ħin pero’ kienu Floriana li żiedu fl-isforzi tagħhom u fis-76 minuta kien il-goalkeeper Mosti Akpan li salva daqqa ta’ ras mill-qrib ta’ El Hasni f’corner, waqt li fit-83 minuta Nascimento dos Santos qassam lil Franklin Sasere li minn qagħda ideali naqas li jikkonkludi.
Ċans ieħor għal Floriana wasal fid-89 minuta iżda x-xutt mill-qrib ta’ Dunstan Vella ġie salvat f’corner minn Akpan.
Mosta kellhom ċans tad-deheb li jmorru fil-vantaġġ fit-92 minuta meta ngħataw penalty għal foul ta’ El Hasni fuq Souleymane Kone fil-kaxxa iżda l-istess Kone mill-11-il metru spara għoli.
Ta’ dan in-nuqqas il-Mostin pattew qares għaliex żewġ minuti wara Floriana skurjaw il-goal tar-rebħ permezz ta’ Jake Grech li għeleb lil Akpan b’xutt imkaxkar wara xogħol tajjeb ta’ Nascimento Dos Santos.
Referee: Trustin Farrugia Cann
Plejer tal-Logħba: Prince Afriyie (Mosta FC)
