“Il-mira ta’ tnaqqis ta’ 1.5 gradi Celsius ma nistgħux immorru lura minnha, għax fuqha jiddependu l-ħajjiet ta’ miljuni ta’ nies.” Din kienet dikjarazzjoni tal-Ministru responsabbli mill-Ambjent f’pajjiżna, Miriam Dalli, waqt il-messaġġ ta’ Malta fil-COP29, li qed issir f’Baku, l-Ażerbajġan.
Filwaqt li appellat għal azzjoni immedjata u deċiżiva, il-Ministru ħeġġet lill-pajjiżi biex jagħtu prijorità lill-bżonnijiet tal-komunitajiet vulnerabbli, filwaqt li jiżguraw li l-isforzi globali jkunu ambizzjużi u inklussivi.
Fil-kummenti tagħha f’isem Malta, il-Ministru spjegat miżuri speċifiċi li l-COP29 irid iwettaq biex jindirizza b’mod effettiv il-kriżi klimatika li qed tiżdied.
Hawnhekk Malta appellat għal kontribuzzjonijiet nazzjonali determinanti li jintegraw b’mod sħiħ l-istrateġiji ta’ mitigazzjoni u addattament.
Malta, li wkoll ġiet imqabbda mill-Unjoni Ewropea biex tirrappreżenta l-pożizzjoni tas-27 pajjiż, saħqet fuq il-ħtieġa għal għan kollettiv kwantifikat ġdid dwar il-finanzjament klimatiku li jirrifletti r-realtajiet tal-lum, b’bażi ta’ donaturi aktar wiesgħa u taħlita ta’ finanzjament pubbliku u privat biex jiġi żgurat finanzjament ġust għall-istati vulnerabbli.
Waqt li enfasizzat il-ħidma innovattiva ta’ Malta, il-Ministru wriet kif modi innovattivi jistgħu jiġġeneraw fondi ħodor għal stati żgħar żviluppati u pajjiżi li qed jiżviluppaw.
Matul id-diskors tagħha, il-Ministru Miriam Dalli qasmet ukoll l-isforzi kontinwi ta’ Malta biex tilħaq in-newtralità klimatika, inkluż it-twaqqif tal-Climate Action Authority biex tiżgura metodu integrat fis-setturi kollha.
