Tliet karozzi tal-linja Nihao China ġew iddekorati b’viżwali mill-isbaħ ta’ pajsaġġi u kulturali taċ-Ċina.
Dan tħabbar fi stqarrija miċ-Ċentru Kulturali Ċiniż, fejn intqal li wieħed jista’ jara dawn nhar is-Sibt li ġej fil-Ġnien tas-Serenità, f’Santa Luċija.
Intqal li l-proġetti tal-karozzi tal-linja jirrappreżenta investiment sinifikanti fl-ekonomija Maltija. Billi ġew involuti disinjaturi, artisti u negozji lokali, din l-inizjattiva tappoġġja t-tkabbir tal-industriji kreattivi u ssaħħaħ is-sħubija bejn Malta u ċ-Ċina, trawwem prosperità kondiviża u vitalità ekonomika.
Dawn il-karozzi tal-linja se jduru madwar Malta sal-ewwel ġimgħa ta’ Jannar.
Dawk li jinzertaw il-karozzi wieqfa jew għaddejjin minn quddiemhom huma mħeġġa jaħtfu ċ-ċans u jipparteċipaw f’xi waħda, jew aktar, minn dawn il-kompetizzjonijiet:
L-Ewwel Kategorija: #SpotTheNihaoChinaBus Kompetizzjoni tar-Ritratti
Iġbed il-viżwali sbieħ taċ-Ċina li qed jidhru fuq dawn il-karozzi. Se jingħataw premijiet għal: l-Isbaħ Ritratt Artistiku tal-karozzi tal-linja Nihao China; l-Aqwa Selfie mal-karozzi tal-linja Nihao China u l-Isbaħ Kollezzjoni tat-tliet karozzi tal-linja Nihao China
It-Tieni Kategorija: #JourneyToChinaBus Kompetizzjoni tal-Filmati Qosra
Oħloq vidjo qasir li juri l-karozzi tal-linja Nihao China u fih ħeġġeġ lill-oħrajn biex iżuru l-inħawi li qed jidhru fuq il-karozzi. Aktar dettalji dwar il-lokalitajiet li qed jidhru fuq dawn il-karozzi ser ikunu qed jittellgħu fuq il-paġna ta’ Facebook taċ-Ċentru Kulturali taċ-Ċina f’Malta. Se jingħataw premijiet għal: l-Aqwa Filmat Qasir; l-Aktar Filmat Informattiv u l-Aqwa Ffilmjar tat-tliet karozzi tal-linja Nihao China.
It-Tielet Kategorija: #CreateYourChinaBus Kompetizzjoni tat-Tpinġija
L-artisti ċkejknin u żgħażagħ huma mistiedna jiddisinjaw il-karozza tal-linja Ċiniża tagħhom billi jpinġu fuqha xi karatteristiċi kulturali, naturali jew xi pajsaġġi taċ-Ċina. Se jingħataw premijiet għal: l-Aqwa Tpinġija; l-Aktar Kunċett Kreattiv u l-Aqwa Rappreżentazzjoni tal-Wirt Kulturali Ċiniż.
Aktar Dettalji: ir-ritratti u l-filmati għandhom jintbagħtu lil events2024ccc@gmail.com jew it-tpinġijiet iridu jittieħdu ċ-Ċentru Kulturali taċ-Ċina f’Malta f’173 Triq Melita, il-Belt.
Is-sottomissjonijiet iridu jaslu sa nhar it-Tnejn, 6 ta’ Jannar 2025.
Ix-xogħlijiet rebbieħa ser jidhru f’esebizzjoni, filwaqt li ser issir ċerimonja għall-għotja tal-premijiet. Din id-data se titħabbar aktar tard.
