L-affarijiet qed jidhru sbieħ għal Birkirkara hekk kif partita wara l-oħra qed jikkonvinċu bis-sħiħ u jkomplu javvanzaw fl-istil ta’ logħob tagħhom. Fl-aħħar partita huma għelbu lil Gzira U. bl-iskor minimu ta’ 1-0 biex ikkonsolidaw posthom fil-quċċata tal-klassifika b’25 punt.
Kienet partita b’xi waqtiet nervużi, fejn fil-fatt ġew murija xejn inqas minn disa’ karti sofor mir-referee Slobodan Petrovic, u li fiha Birkirkara amministraw tajjeb lill-avversarji u ħlief lejn l-aħħar mumenti tal-partita, ftit li xejn tawhom ċans jiddettaw il-logħob tagħhom.
Fost oħrajn reġa’ spikka għall-Istripes, il-player internazzjonali Malti Alex Satariano li reġa’ rriżulta bħala mutur f’nofs il-ground hekk kif qed ikollu staġun mill-aqwa. Fil-fatt, huwa ġie vvutat bħala l-Player tal-Logħba jew il-Most Valuable Player (MVP) mill-ġurnalisti preżenti.
Kienu l-Istripes li ħolqu l-ewwel periklu fit-12-il minuta meta Alex Satariano ttanta xortih permezz ta’ xutt minn tarf il-kaxxa iżda sab lill-goalkeeper ta’ Gzira, Justin Haber, attent, li salva bi bravura.
Huma komplew jiddettaw il-logħob u meritatament fetħu l-iskor żewġ minuti biss wara meta AGUSTIN SANDONA kellu l-ewwel xutt tiegħu imblukkat mid-difiża tal-Maroons biex mir-rebound spara ġewwa, u tefa’ lill-partitarji numerużi Karkariżi f’delirju ta’ ferħ.
Gzira wieġbu għall-ewwel darba fit-43 minuta meta l-captain Zachary Scerri kellu xutt fil-baxx minn barra l-kaxxa li ntemm ftit barra.
Fil-ftuħ tat-tieni taqsima, il-Maroons ħarġu ferm aggressivi u fis-46 minuta Alex Da Paixao Alves dar tajjeb ma’ difensur avversarju qabel ra x-xutt tiegħu salvat bi bravura mill-goalkeeper Taljan tal-Istripes, Giacomo Volpe.
Birkirlara wieġbu fit-58 minuta meta Alex Satariano għalkemm ippressat minn difsenuri ta’ Gzira baqa’ jippersisti u kellu x-xutt tiegħu devjat f’corner minn difensur tal-Maroons.
Gzira tefgħu kollox fuq l-attakk u fit-82 minuta, tilfu ċans tad-deheb li jġibu l-iskor indaqs meta Thaylor Aldama kellu x-xutt tiegħu minn pożizzjoni ideali salvat minn Volpe b’siequ.
Huma komplew jippressaw u tliet minuti wara, Kevin Tulimieri, minn taħt il-lasta kellu d-daqqa ta’ ras tiegħu tintemm ftit barra, b’Birkirkara jeħilsuha ħafif.
Madankollu, l-Istripes, impostati tajjeb fil-ground, komplew jamministraw il-vantaġġ minimu li kellhom sa tmiem il-partita.
Referee: Slobodan Petrovic
Plejer tal-Logħba: Alex Satariano (Birkirkara FC)
