Floriana ftit li xejn tħabtu biex għelbu l-isfida ta’ Balzan bl-iskor ta’ 3-0, biex b’hekk komplew jikkonfermaw staġun mill-aktar diżappuntanti għal dawn tal-aħħar, fejn f’din il-partita lanqas ipproduċew azzjoni waħda denja ta’nota.
Kuntrarju għal Balzan, il-Greens kienu tattikament iddixxipinati u organizzati f’kull dipartiment tul id-90 minuta, biex b’hekk kisbu rebħa meritata u tliet punti prezzjużi.
Huma fetħu l-iskor proprju fl-ewwel periklu li ħolqu fit-tmien minuta meta Guy Serge Cedric Yameogo għadda tajjeb lejn FRANKLIN SASERE li mill-viċin ma ħafirx.
Huma komplew fuq l-offensiva u fil-21 minuta Matias Nicolas Garcia kellu xutt fil-baxx minn barra l-kaxxa li ġie salvat minn mal-art mill-goalkeeper ta’ Balzan, Danilo Golovic.
Kulma jmur kompla d-dominju tal-Greens u fit-33 minuta Sasere dar tajjeb iżda kellu x-xutt tiegħu minn tarf il-kaxxa jintemm għoli.
Fil-ftuħ tat-tieni taqsima, Floriana, komplew fejn ħallew fl-ewwel waħda u fis-46 minuta rduppjaw l-iskor meta minn azzjoni ta’ corner, il-ballun intemm għand FRANKLIN SASERE li minn taħt il-lasta tefa’ ġewwa, biex b’hekk irreġistra doppjetta personali.
Huma komplew jixxalaw u fl-64 minuta għamluhom tlieta meta THIAGUINHO mill-viċin u b’xamma kbira għall-goal tefa’ l-ballun wara l-goalkeeper ta’ Balzan, Danilo Golovic.
Fis-86 minuta, il-Greens kienu kważi għajtu l-għajta tal-goal għar-raba’ darba iżda daqqa ta’ ras mill-viċin ta’ Sasere stampat mal-wieqfa, b’Balzan jeħilsuha ħafif.
Floriana komplew jamministraw il-vantaġġ komdu li kellhom sa tmiem il-partita.
Referee: Trustin Farrugia Cann
Plejer tal-Logħba; Franklin Sasere (Floriana FC)
