Kienet partita mill-isbaħ dik li rat lil Marsaxlokk u Floriana itemmu l-konfront ta’ bejniethom fi draw ġust ta’ 1-1.
Ix-Xlukkajri kienu indubbjament l-aħjar team fl-ewwel taqsima, iżda fit-tieni waħda l-Greens wettqu reazzjoni mill-aqwa u ta’ dan ġew ippremjati permezz tal-goal tad-draw.
Kienu Floriana li ħarġu fuq l-offensiva u wara biss żewġ minuti Kyrian Nwoko ttanta xortih permezz ta’ xutt mid-distanza li ħareġ l-aħjar tal-goalkeeper Serb ta’ Marsaxlokk Marko Drobnjak li dawwar f’corner bi bravura.
Huma komplew fuq l-offensiva u fil-11 minuta Jake Grech xeħet cross-shot għan-nofs li ġie mdawwar f’corner minn difensur ta’ Marsaxlokk.
Marsaxlokk wieġbu żewġ minuti wara meta Alex De Aguilar Gomes avvanza tajjeb fil-kaxxa iżda sab lill-goalkeeper mill-Congo ta’ Floriana Christoffer Mafoumbi li ħareġ barra minn postu u intercetta tajjeb hekk kif salva l-ballun f’corner.
Huma komplew jikbru fil-logħba tagħhom u meritatament fetħu l-iskor fil-25 minuta meta Enmy Manuel Pena Beltre indirizza cross fsid-direzzjoni ta’ ALEX DE AGUILAR GOMES li kkontrolla tajjeb il-ballun qabel mill-viċin spara ġewwa.
Il-Greens wieġbu fit-33 minuta meta wara li rċieva minn azzjoni ta’ corner, Jai Quitongo, kellu l-konklużjoni tiegħu minn pożizzjoni ideali tintemm ftit barra.
Marsaxlokk kienu għoddhom għajtru l-għajta tal-goal għat-tieni darba fit-53 minuta meta Alex Da Aguilar Gomes għadda pass lura lejn Yuri De Jesus Messias li iżda mill-viċin spara għoli.
Mill-azzjoni li segwiet fuq in-naħa l-oħra tal-pitch Floriana appellaw għall-penalty meta l-ballun deher li allegatament ħabat ma’ id Nikola Raden iżda r-referee Malcolm Spiteri ħalla l-logħob għaddej.
Ix-Xlukkajri reġgħu resqu viċin li jirduppjaw l-iskor fil-55 minuta meta Enmy Manuel Pena Beltre kellu x-xutt fil-baxx tiegħu jiġi salvat bi bravura minn mal-art minn Mafoumbi.
Il-Greens wieġbu fit-62 minuta meta Sasere niżżel il-ballun lejn Kemar Reid li kellu x-xutt fil-baxx tiegħu jintemm ftit barra.
Huma komplew jipproduċu logħob sabiħ u sa fl-aħħar sabu l-goal tad-draw fis-66 minuta meta Sasere niżżel il-ballun lejn il-captain DUNSTAN VELLA li deċiż fil-konklużjoni tiegħu mill-viċin tefa’ wara Drobnjak.
Fil-ħin miżjud, Marsaxlokk kellhom ferħa bla temma, meta s-sostitut Duane Bonnci minn taħt il-lasta rnexxilu jitfa’ l-ballun fix-xibka, iżda r-referee Malcolm Spiteri ġġudika li huwa kien jinsab f’pożizzjoni ta’ offside u b’hekk ħassar dan il-goal b’mod immedjat.
L-iskor baqa’ ma nbidix sa tmiem il-partita biż-żewġ timijiet jieħdu punt kull wieħed.
Referee: Malcolm Spiteri
Plejer tal-Logħba: Dunstan Vella (Floriana FC)
