F’partita mill-isbaħ, Gzira kisbu punt prezzjuż b’mod drammatiku fi draw ta’ 1-1 kontra Naxxar Lions, bil-goal tant importanti għalihom jasal proprju fil-ħin miżjud.
Kienu Naxxar li fetħu l-iskor proprju fl-ewwel periklu li ħolqu fl-20 minuta meta wara li rċieva minn cross perfett mil-lemin ta’ Edson Farias Cerquiera, LUAN SERGIO NASCIMENTO kien fil-post it-tajjeb fil-mument opportun u permezz ta’ daqqa ta’ ras preċiża tefa’ ġewwa.
Gzira wieġbu fis-26 minuta permezz ta’ xutt mid-distanza ta’ Hassany Faysal Chouaib li iżda ntemm għoli.
Huma komplew jippressaw u fil-31 minuta Alex Da Paixao Alves kellu x-xutt angulat fil-baxx tiegħu jintemm ftit barra.
Iżda kienu Naxxar li għoddhom irduppjaw l-iskor fis-37 minuta meta Luan Sergio Nascimento kellu x-xutt tiegħu minn ġol-kaxxa jistampa ma’ sieq il-wieqfa, biex b’hekk tilef iċ-ċans li jirreġistra doppjetta personali.
Il-pressjoni kienet kollha fuq il-Maroons u fil-ftuħ tat-tieni taqsima ħarġu ferm aggressivi fit-tentattiv ovvju li jġibu l-iskor ndaqs u fis-47 minuta s-sostitut Kevin Tulimieri kellu x-xutt tiegħu mid-distanza salvat b’diffikultá minn mal-art mill-goalkeeper ta’ Naxxar, Matthis Debono.
Huma komplew jiddettaw il-logħob u żewġ minuti biss wara, f’azzjoni kważi foto-kopja għal dik ta’ qabilha reġa’ kien Tulimieri li mpenja lil Debono permezz ta’ xutt ieħor mid-distanza, bil-goalkeeper Naxxari jerġa’ jkun attent u jsalva tajjeb.
Naxxar wieġbu minuta biss wara mera Gustavo Barbosa Santos kellu x-xutt tiegħu li għadda għoli.
Iżda kienu Gzira li reġgħu resqu ferm viċin li jġibu l-iskor indaqs fl-64 minuta meta Christian Saint Ebisindor kellu d-daqqa ta’ ras tiegħu minn taħt il-lasta tiġi salvata minn Debono.
Gzira tefgħu kollox fuq l-attakk u fl-84 minuta daqqa ta’ ras mill-viċin ta’ Hayssany Faysal Chouhab reġgħet sabet lil Debono attent.
Erba’ minuti wara, Naxxar qalgħu daqqa ta’ ħarta meta spiċċaw jilagħbu b’10 players meta tkeċċa għalihom il-player Degran Jackson, wara li rċieva żewġ karti sofor fil-partita.
Gzira ġabu l-iskor indaqs b’mod drammatiku fil-ħin miżjud meta wara li rċieva minn cross, CHRISTIAN SAINT EBSINIDO kellu d-daqqa ta’ ras preċiża tiegħu tintemm wara Debono, fost id-delirju ta’ ferħ tal-partitarji tal-Maroons.
Referee: Daniel Portelli
Plejer tal-Logħba: Luan Sergio Nascimento
