Sliema Wanderers ftit li xejn tħabtu biex għelbu l-isfida ta’ Zabbar SP bl-iskor ta’ 2-0, biż-żewġ goals għalihom jaslu fl-ewwel taqsima. Huma ddominaw lill-avversarji tul id-90 minuta, bl-affarijiet jikkomplikaw ruħhom għaż-Żabbarin fl-aħħar 20 minuta hekk kif spiċċaw jilagħbu bi player inqas.
Din il-partita mmarkat l-ewwel partita fuq il-bank għall-kowċ il-ġdid ta’ Zabbar, it-Taljan Aniello Parisi.
Kienu Zabbar li ħolqu l-ewwel periklu fis-sitt minuta meta Marcelo Barros Santos kellu x- xutt tiegħu mid-distanza jgħaddi ftit barra.
Sliema wieġbu erba’ minuti wara permezz ta’ freekick insidjuż ta’ Mohamed Awad li ġie mdawwar f’corner b’diffikultá mill-goalkeeper ta’ Zabbar, Matthew Grech.
Mill-corner li rriżulta, JEAN BORG kien fil-post it-tajjeb fil-mument opportun u b’xamma kbira għall-goal tefa’ ġewwa.
Kulma jmur kompla d-dominju assolut tal-Wanderers u fit-32 minuta, irduppjaw l-iskor, meta f’azzjoni maħduma bizzilla, SIMON ZIBO, b’eleganza u permezz ta’ xutt minn barra l-kaxxa tefa’ l-ballun fir-rokna tax-xibka.
Dan sabiex fis-37 minuta huma kienu għoddhom għajtu l-għajta tal-goal għat-tielet darba meta Wescley Matos Da Silva wara li rċieva minn cross pinġut mil-lemin, għola tajjeb u kellu d-daqqa ta’ ras tiegħu tistampa mal-mimduda, biż-Żabbarin jeħilsuha ħafif.
Il-Blues komplew jassedjaw il-lasti avversarji u fit-43 minuta meta Myles Beerman ittanta xortih permezz ta’ xutt mid-distanza li iżda sab lill-goalkeeper ta’ Zabbar Matthew Grech attent u dawwar tajjeb f’corner.
Il-ftuħ tat-tieni taqsima kien wieħed ferm kwiet u nieqes minn kull emozzjoni.
Dan sal-71 minuta meta Zabbar SP spiċċaw jilagħbu b’10 players meta tkeċċa għalihom il-player Strahinja Jovancic wara li rċieva żewġ karti sofor fil-partita.
Sliema tilfu ċans tad-deheb li jagħmluhom tlieta fil-ħin miżjud meta s-sostitut Ubada Hijazi ġie wiċċ imb’wiċċ ma’ Matthew Grech u ra lil dan tal-aħħar isalva bi bravura biex salva goal cert.
Bi player iktar u mingħajr ebda diffikultá, Sliema komplew jamministraw il-vantaġġ doppju li kellhom sa tmiem il-partita.
Referee: Matthew De Gabriele
Player tal-Logħba: Simon Zibo (Sliema W.)
