Eluf ta’ segwaċi tas-serje popolari ‘Game of Throne’s attendew għall-irkant li sar mill-Heritage Auctions f’Dallas l-Istati Uniti u li fih ġew irkantati aktar minn 900 biċċa li kienu jinkludu kurazzi, xwabel u armi, ġojjellerija u kostumi kif ukoll attrezzatura oħra sinifikanti li ntużat waqt il-ġbid ta’ din is-serje magħrufa mad-dinja kollha.
L-aktar oġġett li ġab flus kien it-tron tal-ħadid, l-istess wieħed li l-karattri tas-serje għamlu tmien staġuni jiġġieldu biex jiksbu. F’battalja li damet sitt minuti, it-tron inbiegħ għas-somma ta’ $1.49 miljun ekwivalenti għal €1.3 miljun.
Ir-replika kienet magħmula mill-plastik u maħduma fuq il-verżjoni oriġinali użata fuq l-iskrijn li ġiet irfinata b’żebgħa metallika u ġojjelli. Fis-serje it-tron suppost kien immuddellat min-nifsijiet tad-draguni li dewbu x-xwabel ta’ eluf ta’ sfidanti megħluba u kien is-simbolu tal-ġlieda għall-poter matul is-serje kollha.
Fi stqarrija maħruġa l-Ħadd, Heritage Auctions qalu li l-irkant ġabar aktar minn $21.1 miljun minn aktar minn 4,500 persuna u huwa t-tieni l-akbar irkant tax-xena tal-ispettaklu li ġab flus wara l-irkant ta’ Debbie Reynolds fl-2011.
Minbarra t-tron, aktar minn 30 oġġett ieħor inbiegħu għal somom b’sitt figuri. Ix-xabla ta’ Jon Snow, Longclaw, inbiegħet għas-somma ta’ $400,000 filwaqt li l-ilbies li kien jilbes matul il-lejl inkluż kappott oħxon marru għal $337,500.
L-offerti inizjali kienu jvarjaw minn $500 sa $20,000 imma ħafna mill-affarijiet inbiegħu għal ferm aktar bħal ma kien fil-każ ta’ diversi mantelli u lbiesi milbusa minn Emelia Clarke u Lena Headey li ħadmu il-partijiet ta’ Daenerys Targaryen u Cersei Lannister rispettivament. Libsa griża milbusa minn Daenerys inbiegħet $112,500, mitt elf dollaru aktar mill-offerta inizjali u l-libsa l-ħamra li Cersei tidher biha fl-aħħar xena tagħha tas-serje ġabet is-somma ta’ $137,500 wara li l-offerti fetħu bis-somma ta’ $15,000.
Il-kurazzi wkoll kienu popolari speċjalment fejn kienu jinkludu armi mfittxija b’dik tal-ġilda sewda ta’ Jaime Lannister marret għas-somma ta’ $275,000 u dik tal-Kingsguard li tinkludi ix-xabla ikonika tiegħu Oathkeeper inbiegħet għas-somma ta’ $212,500. Il-kurazza milbusa mill-karattru Gregor ‘The Mountain” Clegane wkoll ġabet din l-istess somma.
