Tyler Mifsud jirċievi borża ta’ studju prestiġjuża fil-qasam tat-tiġrijiet taż-żwiemel
Meta f-1995 is-sewwieq u trainer Svediż b’fama mondjali, Stig H Johansson kien iċċelebra għeluq il-50 sena tiegħu, kienet ġiet imwaqqafa akkademja li minnha s’issa diġa bbenefikaw aktar minn 70 apprentist. Eliġibbli biex japplikaw huma żgħażagħ li għandhom bejn it-18 u 30 sena u li jaħdmu ġo stalel professjonali fl-Isvezja.
Din il-borża ta’ studju tkopri sena taħriġ li permezz tagħha jkun aktar faċli sabiex apprentist jilħaq trainer professjonali. Fost l-ismijiet li fil-passat ibbenefikaw minn dan insibu trainers u sewwieqa rinomati bħal Daniel Redén u Johan Untersteiner.
Tyler Mifsud għandu 27 sena u Malta kien joqgħod il-Birgu. Sabiex isegwi l-ħolma tiegħu li jibni karriera fit-tiġrijiet taż-żwiemel, ta’ sittax-il sena flimkien mal-familja tiegħu telaq lejn l-Iżvezja fejn nistgħu ngħidu l-potenzjal tiegħu mill-ewwel attira l-attenzjoni tal-aqwa trainers.
Iżda mhux kollox kien ward u żahar fejn is-sena l-oħra din il-ħolma kienet kważi ġiet distrutta f’każ li ġiebet l-attenzjoni tal-midja ewlenija fil-qasam tat-tiġrijiet taż-żwiemel. Fortunatament kollox kien risolt b’mod ġust favur Tyler fejn għal darb’oħra kellu jaħdem bis-sod biex jerġa jġib lura dak li kien kważi tilef.
Tyler jaħdem bħala t-tieni trainer fl-istalel ta’ Joakim Lövgren, wieħed mit-trainers ewlenin ibbażat fin-Nofsinhar tal-Iżvezja fil-korsa ta’ Jägersro ħdejn il-belt ta’ Malmö. Huwa jsuq regolarment u din is-sena diġa rnexxielu jirbaħ erbatax-il tiġrija inkluż tiġrija finali u importanti għal sewwieqa apprentisti, il-Birger Bengtssons Minne. L-aħjar sena tiegħu s’issa kienet l-2021 meta kien rebaħ total ta’ 25 tiġrija.
Għalkemm issa ilu snin jgħix l-Iżvezja però Tyler xorta għandu mħabba kbira għall-pajjiżu u filfatt mill-bidu ta’ din is-sena, permezz tal-għajnuna offruta lilu mill-Awtorità Maltija għat-Turiżmu, qed jidher kullimkien bir-riklam ta’ VisitMalta fejn fuq il-mezzi soċjali tiegħu kemm-il darba ikkummenta li hu kburi li jirrappreżenta lill-pajjiżu Malta.
Il-borża ta’ studju ġiet ippreżentata lil Tyler is-Sibt fil-korsa ta’ Solvalla qrib il-belt ta’ Stokkolma waqt programm ta’ tiġrijiet mill-aktar importanti fil-kalendarju tat-tiġrijiet Svediżi. Flimkien ma’ Tyler, tliet żgħażagħ oħra, Anton Knutsson, Johanna Lind u Saga Laursen, irċievew din il-borża ta’ studju.
