Franċiż b’qabża ta’ 145 pied f’tentattiv biex jikser rekord dinji

Franċiż ta’ 22 sena, Come Girardot, qabeż minn għoli ta’ iżjed minn 145 pied, jew iżjed minn 44 metru, f’tentattiv biex jikser rekord dinji.
Iż-żagħżugħ minn Bordeaux qabeż minn fuq l-irdum tal-kaskata La Cimbarra ħdejn il-belt ta’ Aldeaquemada fi Spanja f’kundizzjoni tat-temp mhux daqshekk favorevoli peress li kien riħ qawwi.
Il-qabża fl-arja damet tliet sekondi u għodos fl-ilma b’veloċità ta’ 106 kilometru fis-siegħa.
F’kumment wara hu qal li l-akbar ostaklu kien il-ħsieb mentali qabel il-qabża, filwaqt li rrimarka li l-ħin qabel l-mpatt mal-ilma kien aktar milli ħaseb u f’dak il-mument esperjenza sensazzjoni ta’ adrenalina kbira.
In-Norveġiż Ken Stornes u l-Iżvizzeru Lucien Charlon, li t-tnejn kienu preżenti bħala lifeguards, qalu li huma jifformaw parti minn grupp ta’ ħbieb. Stornes innifsu kien waqqaf rekord b’qabża ta’ 40.5 metri f’Diċembru tal-2023 u Charlon kien tejjeb il-qabża għal 41.7 metri f’Awwissu li għadda.