F’partita pjaċevoli li pproduċiet xejn inqas minn sitt goals, Zabbar SP u Naxxar L. temmew il-konfront ta’ bejniethom fi draw ġust ta’ 3-3.
Naxxar Lions fetħu l-iskor proprju fl-ewwel periklu li ħolqu fit-12-il minuta meta wara li rċieva minn cross ta’ Degran Jackson, il-captain EDSON FARIAS CERQUEIRA għola tajjeb u permezz ta’ daqqa ta’ ras preċiża tefa’ l-ballun fir-rokna tax-xibka, fejn il-goalkeeper ta’ Zabbar SP Matthew Grech ma seta’ jilħaq qatt.
Zabbar wettqu reazzjoni tajba u fl-14-il minuta, Brian Gambarte għadda tajjeb lejn Diogo Joao li kellu t-tentattiv tiegħu minn taħt il-lasta jiġi salvat b’siequ mill-goalkeeper ta’ Naxxar Lions, Matthias Debono.
Huma komplew jiddettaw il-logħob u żewġ minuti biss wara reġa’ kien Diogo Joao li mpenja lil Matthias Debono li reġa’ salva tajjeb.
Kulma jmur kompla d-dominju taż-Żabbarin u fit-23 minuta kellhom ferħa bla temma meta Stefan Ilic għadda atjjeb lejn Diogo Joao li mill-viċin tefa’ ġewwa, iżda r-referee fuq senjalazzjoni tal-assistant referee Alan Camilleri kien pront u ħassar dan il-goal minħabba li ġġudika li Ilic kien jinsab f’pożizzjonai ta’ offside.
Iżda ħames minuti wara Zabbar ma kellhomx jiġu mċaħħda meta MARCELO BARROS SANTOS minn pożizzjoni ideali dar tajjeb u permezz ta’ xutt fil-baxx tefa’ l-ballun fir-rokna tax-xibka.
Fl-40 minuta, il-coach ta’ Naxxar George Vella kien kostrett jaffettwa sostituzzjoni sfurzata meta weġġa’ għalihom il-player Gustavo Barbosa Santos, biex minfloku daħal jilgħab is-sostitut Caxambu.
Fl-54 minuta, cross-shot insidjuż ta’ Degran Jackson għal Naxxar ġie interċettat minn Matthew Grech.
Huma komplew fuq offensiva u tliet minuti wara reġgħu marru fil-vantaġġ meta minn freekick mogħti minn Caxambu, difensur ta’ Zabbar fit-tentattiv li jikklerja l-ballun bla ma ried għadda l-ballun lejn EDSON FARIAS CERQUEIRA li minn taħt il-lasta u permezz ta’ daqqa ta’ ras preċiża tefa’ ġewwa, biex b’hekk irreġistra doppjetta personali.
Iżda Zabbar ma rmewx ix-xugaman anzi wettqu reazzjoni tajba u fis-70 minuta ġabu l-iskor indaqs meta Brian Gambarte provda l-assist lejn is-sostitut żagħżugħ SEAN GATT, bil-ballun jaħbat ma’ saqajn dan tal-aħħar u jintemm ġewwa.
Huma qalbu l-iskor favurihom fis-86 minuta permezz ta’ freekick kapolavur ta’ DIOGO JOAO li ma ta l-ebda ċans lil Matthias Debono.
Id-drama kienet għadha ma ntemmitx hawn hekk kif fit-88 minuta Zabbar spiċċaw jilagħbu b’10 players meta tkeċċa għalihom il-player Strahinja Jovancic b’karta ħamra diretta wara daħla kerha fuq player ta’ Naxxar.
Naxxar Lions rebħu penalty fil-ħin miżjud meta Matthew Grech waqqa’ lill-player avversarju fil-kaxxa. Mill-11-il metru inkariga ruħu CAXAMBU li ma żbaljax.
Referee: Malcolm Spiteri
Plejer tal-Logħba: Edson Cerqueira Farias (Naxxar L.)
