Fit-tieni partita tal-Ħadd fit-Tony Bezzina Stadium lagħbu Mosta u Hamrun Spartans biċ-ċampjins renjanti jiġu megħluba 1 – 0 b’goal lejn it-tmiem biex b’hekk din kienet l-ewwel telfa għal Spartans u l-ewwel punti staġjonali għal Mosta.
L-azzjonijiet fl-ewwel taqsima kienu rari għalkemm Hamrun iddominaw għal ħinijiet twal madankollu d-difiża ta’ Mosta kienet soda biżejjed sabiex żammet taħt kontroll is-sitwazzjonijiet kollha li ġew kontriha.
L-ewwel azzjoni waslet wara tliet minuti meta l-konklużjoni ta’ Joseph Mbong ġiet salvata bla wisq problemi minn Akpan ta’ Mosta.
Risposta ta’ Mosta mal-kwarta logħob meta f’kontrattakk, l-kross ta’ Zachary Brincat ġie mdawwar f’corner minn Barbosa.
Hamrun fuq l-attakk fis-36 minuta meta Freitas qassam lejn Montebello bil-konklużjoni tal-attakkant Ħamruniż salvat b’diffikulta mill-goalkeeper Akpan. Pero Hamrun kellhom ċans tad-deheb li jmorru fil-vantaġġ eżatt qabel tmiem l-ewwel taqsima meta Larsson Coulibaly wettaq foul fuq Juan Corbolan, bir-referee Fyodor Zammit jorndna penalty li minnhu Luke Montebello kellu l-konklużjoni tiegħu tistampa mal-minduda.
Anke fit-tieni taqsim l-azzjonijiet ma’ kienux spissi bl-ewwel waħda perikoluża tasal fil-68 minuta min Mosta meta x-xutt ta’ Giancarlo Concalves għadda għoli.
Hamrun wieġbu u fil-77 minuta xutt tas-sostitut Shaisen Attard għadda għoli.
Hamrun lagħbu l-aħħar għaxar minuti b’plejer anqas meta għalihom tkeċċa d-difensur laterali Ryan Camenzuli hekk kif deher jagħdi xi kummenti mhux xierqa.
Il-partita dehret destinata għal draw ta’ mingħajr goals iżda Mosta, minuta mit-tmiem, skorjaw il-goal tar-rebħa meta s-sostitut Sunday Okereke irnexxilu jisraq l-ballun lid-difiża Ħamruniża u bir-ras tefa’ l-ballun fix-xibka b’dan il-goal jagħti ftit tan-nifs lil Mosta iżda fl-stess waqt jagħti l-ewwel telfa lill-Spartans.
Referee: Fyodor Zammit.
Plejer tal-logħba: Prince Afriyie (Mosta FC)
