Wara tant paniku li ħolqu Daphne Caruana Galizia u l-Partit Nazzjonalista dwar mandati ta’ sekwestru fil-konfront tagħha u wara li għamlet ġabra biex tkun tista’ tiffinanzja l-passi li ttieħdu kontriha bil-liġi, issa Daphne Caruana Galizia stess iddikjarat l-intenzjoni tagħha li tagħmel mandat ta’ sekwestru.
Dan għamlitu fil-konfront ta’ Glenn Bedingfield li fil-blog tiegħu żvela kif fil-Birgu kien hemm applikazzjoni fuq Peter Caruana Galizia, biex eventwalment irriżulta li Caruana Galizia qed jaġixxi f’isem trust. Fi kliem ieħor xi ħadd li ma nafux min hu.
Mid-dehra Caruana Galizia ħadet għaliha b’xi kummenti ta’ qarrejja fil-blog u hawn heddet bis-sekwestri. Bedingfield innota li jekk qed tipprova tbeżżgħu ħabtet bieb ħażin.
Intant, meta wara sensiela ta’ qlajjiet saru mandati ta’ sekwestri fil-konfront tagħha flimkien ma’ numru ta’ libelli il-Kap tal-Oppożizzjoni organizza protesta u manifestazzjoni f’Tas-Sliema.
