Permezz ta’ wirja kollettiva u ta’ karattru, Hibernians għelbu lil Gzira United bl-iskor ta’ 2-0, biż-żewġ goals għalihom jaslu fit-tieni taqsima.
Kienu l-Pawlisti li ħolqu l-ewwel periklu wara biss ħames minuti meta wara li rċieva minn corner mix-xellug ta’ Giannis Bastianos, Rodrigo Frage Khevin kellu t-tentattiv tiegħu jintemm ftit barra.
Minuta biss wara, Kevin Tulimieri għall-Maroons tefa’ għoli minn pożizzjoni ideali.
Huma komplew fuq l-offensiva u fid-19-il minuta Faysal Hassany kellu tentattiv mil-lemin li ħabat max-xibka minn barra biex ta l-illużjoni tal-goal.
Hibernians wieġbu fis-37 minuta meta xutt b’saħħtu ta’ Rodrigo Frage Khevin intemm ftit għoli. Minuta mill-ftuh tat-tieni taqsima, il-Pawlisti kienu sfortunati li laqtu l-lasta permezz ta’ Giannis Bastianos u fis-57 minuta, il-midfielder Grieg laqat il-mimduda permezz ta’ freekick insidjuż mil-lemin b’Dexter Xuereb jitfa’ għoli mir-rebound.
Gzira wieġbu permezz ta’ ġirja tajba ta’ Christian Ebisindor Saint fuq ix-xellug iżda minflok ikkonkluda, għadda l-ballun għan-nofs u l-ebda wieħed mill-players sħabu ma rnexxielu jagħmel kuntatt mal-ballun, bl-azzjoni tisfuma fix-xejn.
Hibernians irnexxielhom jiftħu l-iskor fid-69 minuta meta GIANNIS BASTIANOS irċieva l-assist mix-xellug u permezz ta’ xutt ill-isbaħ ma ta l-ebda ċans lill-goalkeeper Kroat ta’ Gzira, Darijan Zarkov.
Il-Maroons kellhom ċans tad-deheb li jġibu l-iskor indaqs fis-79 minuta meta rebħu penalty wara li Higor Gabriel waqqa’ lil Jurgen Pisani fil-kaxxa. Madankollu, it-tentattiv ta’ Joseph Minala mill-11-il metru ġie newtralizzat mill-goalkeeper ta’ Hibernians, Hugo Sacco.
Tliet minuti biss wara, Gzira tilfu ċans ieħor tajjeb ta’ skor meta s-sostut Alex Da Paixao Alves xeħet cross invitanti mix-xellug iżda Thaylor Aldama u Ebisindor Saint naqsu milli jagħmlu kuntatt mal-ballun.
Fil-85 minuta, il-Pawlisti ssiġillaw ir-rebħa permezz tat-tieni goal meta Farid Romero Zuniga tilef il-pussess tal-ballun, għas-spejjeż tas-sostitut ISAIAH CHUKUNYERE li kien ilu biss ħames minuti fil-ground, avvanza fil-kaxxa, dar ma’ Zarkov qabel tefa’ l-ballun fix-xibka.
Referee: Ishmael Barbara
Plejer tal-Logħba: Giannis Bastianos (Hibernians FC)
