Birkirkara kisbu l-ewwel tliet punti tal-istaġun meta għelbu lil Zabbar SP bl-iskor minimu ta’ 1-0. Kienet partita ferm tattika u kemmxejn medjokri bl-azzjonijiet denji ta’ nota fuq iż-żewġ naħat ikunu ferm remoti.
Kienet rebħa kollox ma’ kollox meritata għall-Istripes fejn kienu huma li pproduċew l-isbaħ logħob, madankollu ta’ min wieħed ifaħħar il-wirja ta’ Zabbar li bħalma għamlu fil-partita preċedenti kontra Hamrun Spartans offrew oppożizzjoni denja tul id-90 minuta.
Birkirkara bdew ikunu iktar avventurużi u joperaw minn mal-faxex laterali, iżda sabu difiza ferm kumpatta u organizzata ta’ Zabbar li għal diversi drabi annullat l-attakki tagħhom.
Kienu Zabbar li ħolqu l-ewwel periklu fis-16-il minuta permezz ta’ xutt fil-baxx mid-distanza tal-Portugiż Augusto Ferreira li ħareġ l-aħjar tal-goalkeeper Taljan ta’ Birkirkara Giacomo Volpe li dawwar tajjeb f’corner wara li ntefa’ minn tulu fl-art.
Il-partita kompliet ikkaratterizzata minn ħafna logħob f’nofs il-ground. Dan sal-45 minuta meta Birkirkara rebħu penalty hekk kif Augusto Ferreira waqqa’ lil Leandro Lautaro Lacunza fil-kaxxa. Mill-11-il metru inkariga ruħu l-ispeċjalista MAXUELL MAIA li ma żblajx hekk kif permezz ta’ xutt b’saħħtu spara l-ballun fir-rokna tax-xibka, b’dan ikun ir-raba’ goal staġjonali tiegħu.
Kien biss fit-62 minuta li waslet l-azzjoni sussegwenti denja ta’ nota, bl-Istripes ikunu huma li joħolqu l-periklu meta Maxuell Maia dar tajjeb mal-captain ta’ Zabbar Dorde Jovicic, avvanza tajjeb fil-kaxxa qabel impenja lill-goalkeeper ta’ Zabbar Matthew Grech li dawwar f’corner bi bravura biex żamm lit-tim tiegħu fil-partita.
Zabbar wieġbu fil-81 minuta permezz ta’ xutt mid-distanza ta’ Marcelo Barros Santos li ġie devjat f’corner minn difensur ta’ Birkirkara. Mill-corner li rriżulta, David Oliveira Souza, kellu x-xutt bid-dawra tiegħu minn qagħda ideali salvat minn mal-art minn Volpe.
Huma tilfu ċans tad-deheb li jġibu l-iskor indaqs fid-89 minuta meta konklużjoni mill-viċin taż-żagħżugħ Sean Gatt intemmet ftit barra.
Zabbar tefgħu kollox fuq l-attakk fit-tentattiv li jġibu l-iskor indaqs, iżda Birkirkara kkontrollaw tajjeb u komplew jamministraw il-vantaġġ minimu li kellhom sa tmiem il-partita.
Referee: Malcolm Spiteri
Plejer tal-Logħba: Maxuell Maia (Birkirkara)
