Għall-ewwel darba, l-istazzjon Britanniku BBC Radio 1 Dance wassal xandira diretta mill-klabb ‘UNO’ f’pajjiżna ta’ avveniment, li jagħmel parti mill-festival SummerDaze u li ta’ kull sajf jattira lejh eluf kbar ta’ żgħażagħ lokali u barranin.
Waqt il-festival, li jsir bl-appoġġ tal-Gvern, permezz tal-Awtorità Maltija tat-Turiżmu, l-MTA, is-segwaċi tal-BBC setgħu jsegwu minn fuq il-websajt tal-istazzjon l-atmosfera kollha li joffri s-sajf Malti, b’kunċerti simili tal-massa b’mużika moderna u spettaklu viżiv.
Din ix-xandira ttellgħet bis-sehem ta’ numru ta’ artisti rinomati, fosthom Lost Frequencies, Sonny Fodera, Jax Jones, Solardo u Zerb.
BBC Radio 1 Dance, li ilu jxandar onlajn biss minn erba’ snin ilu ’l hawn, għandu udjenza li llum tlaħħaq iżjed minn ħamsa u ħamsin miljun minn madwar id-dinja.
