Gzira U. bdew l-istaġun fuq nota pożittiva meta għelbu lil Marsaxlokk bl-iskor minimu ta’ 1-0. Indubbjament, huma kienu l-aħjar team fil-partita fejn ħolqu diversi azzjonijiet denji ta’ nota iżda sabu lill-goalkeeper Serb ta’ Marsaxlokk Marko Drobnjak f’vena mill-aqwa fejn salva diversi goals ċerti u fil-fatt ġie vvutat bħala l-Player tal-Logħba mill-ġurnalisti preżenti.
Gzira dehru organizzati u ftit li xejn taw ċans lix-Xlukkajri jiddettaw il-logħob tagħhom. Min-naħa l-oħra Marsxaokk naqsu milli jsibu l-ispazji, anzi bdew iħallu ħafna spazji lill-Maroons li bdew joperaw minn fuq il-linji, waqt li ftit li xejn kienu inċisivi fl-attakk.
Kien biss fid-19-il minuta li waslet l-ewwel azzjoni denja ta’ nota, bi Gzira jkunu huma li joħolqu l-periklu meta xutt angolat minn tarf il-kaxxa ta’ Hassany Faysal għadda ftit għoli.
Il-kumplament ta’ din it-taqsima kien ikkaratterizzat minn ħafna logħob f’nofs il-ground, fejn ma ġiet innutata l-ebda azzjoni oħra denja ta’ nota miż-żewġ timijiet.
Fil-ftuħ tat-tieni taqsima, Gzira, ħarġu ferm aggressivi u fis-47 minuta Christian Saint Ebinsinidor avvanza tajjeb qabel kellu x-xutt fil-baxx tiegħu salvat bi bravura minn Drobnjak.
Huma komplew jiddettaw ill-logħob u fit-52 minuta tilfu cans tad-deheb li jiftħu l-iskor meta Thaylor Aldama indirizza cross-shot għan-nofs li ġie mblukkaat miid-difiża ta’ Marsaxlokk biex mir-rebound iż-żagħżugħ Brooykln Borg reġa’ sab lil Drobnjak attent b’dan tal-aħħaar juri riflessi mill-aqwa u jkun providenzjali għat-tim tiegħu.
Kulma jmur kompla d-dominju assolut tal-Maroons u erba’ minuti wara, xutt fil-baxx ta’ Ebisinidor ġie salvat f’corner ieħor minn fuq il-linja minn Lucas Emanuel Lopez.
Gzira reġgħu ħolqu l-periklu fid-79 minuta permezz ta’ xutt mid-distanza tas-sostitut Kevun Tulimieri li ntemm ftit barra.
Azzjoni wara l-oħra, finalment u meritatament, f’azzjoni ta’ kontrattakk veloċi, Gzira fetħu l-iskor fid-89 minua, liema goal kellu jkun dak tar-rebħa meta Thaylor Aldama avvanza tajjeb fil-kaxxa, b’altruwiżmu għadda tajjeb lejn is-sostitut ALEX DA PAIXAO ALVES li b’xamma kbira għall-goal tefa’ ġewwa għal 1- 0.
Ħin għal reazzjoni min Marsaxlokk ma’ kienx fadal u għalhekk Gzira ħadu l-ewwel tliet punti staġjonali.
Referee: Alex Johnson
Plejer tal-Logħba: Marko Drobnjak (Marsaxlokk FC)
