F’partita mill-isbaħ li pproduċiet xejn inqas minn sitt goals, Melita kisbu draw drammatiku ta’ 3-3 kontra Floriana.
Fit-tmien minuta Melita fetħu l-iskor meta wara li rċieva minn corner ta’ Alan Borg Olivier mix-xellug, ALDAIR SIMANCA PENA permezz ta’ daqqa ta’ ras preċiża tefa’ ġewwa.
Iżda Floriana wettqu reazzjoni tajba u tilfu ċans kbir li jġibu l-iskor indaqs seba’ minuti wara meta Mattia Veselji mill-viċin tefa’ barra. Fit-22 minuta, Fernandinho, dejjem għall-Greens indirizza cross mix-xellug lejn Jake Grech li tefa’ ġewwa iżda l-goal tħassar minħabba offside.
Melita wieġbu fis-36 minuta permezz ta’ freekick ta’ Alan Borg Olivier li ġie mdawwar f’corner mill-goalkeeper ta’ Floriana, Christoffer Mafoumbi, u mill-corner li rriżulta mogħti minn Borg Olivier, ANDRE CARLOS PENHA DA COSTA tefa’ ġewwa permezz ta’ daqqa ta’ ras preċiża biex irodppja l-iskor għan-neo-promossi.
Floriana naqqsu l-marġni tal-iskor fl-40 minuta meta Thiaguinho Santos ipprovda l-assist mil-lemin lejn CARLO ZAMMIT LONARDELLI li għeleb lill-goalkeeper ta’ Melita Gosef Mizzi permezz ta’ xutt sabiħ minn barra l-kaxxa.
Fil-ħin miżjud Jake Grech dejjem għall-Greens għadda tajjeb lejn Thiaguinho fuq il-lemin li kkonkluda azzjoni tajba permezz ta’ xutt b’saħħtu li madankollu ġie mblukkat f’corner minn Mizzi.
Fil-61 minuta, is-sostitut Aleandro Garcia għal Floriana li ħa post l-imweġġa’ Zammit Lonardelli, kellu xutt minn barra l-kaxxa salvat tajjeb minn Mizzi. Tliet minuti biss wara, il-Greens ġabu l-iskor indaqs. Dan meta Thiaguinho għadda tajjeb lejn Dunstan Vella fuq il-lemin b’dan jipprovdi assist perfett lil KYRIAN NWOKO li mill-viċin tefa’ ġewwa.
Fis-66 minuta Jake Grech ittanta xortih permezz ta’ xutt b’saħħtu minn barra l-kaxxa iżda Mizzi salva tajjeb.
Floriana qalbu l-iskor favurihom erba’ minuti wara, meta MATTIA VESELJI rebaħ il-ballun minn clerance ta’ Mafoumbi, u wara li evita daħla ta’ difensur avversarju, avvanza tajjeb fil-kaxxa qabel b’eleganza tefa’ l-ballun fix-xibka.
Madankollu, erba’ minuti fil-ħin miżjud, Melita ġabu l-iskor indaqs b’mod drammatiku meta Ben Cassar żmarka lil JEAN PIERRE ATTARD fil-kaxxa, bil-captain ta’ Melita jitfa’ l-ballun wara Mafoumbi.
Referee: Ezekiel Barbara
Plejer tal-Logħba: Thiaguinho (Floriana)
