Sliema W. għelbu lil Mosta bl-iskor ta’ 2-0, biż-żewġ goals għalihom jaslu fit-tieni taqsima, biex b’hekk kisbu l-ewwel tliet punti tal-istaġun.
Kienet rebħa meritata għall-Wanderers fejn kienu huma li ddettaw il-partita għall-ħinijiet twal u li kieku kienu iktar preċiżi fl-attakk, l-iskor seta’ saħansitra kien akbar favurihom.
Kienu Sliema li ħolqu l-ewwel periklu fis-seba’ minuta meta wara li rċieva minn cross mil-lemin ta’ Steve Pisani, Vito Plut, b’xi mod evita d-daħla taż-żagħżugħ Jake Vassallo qabel minn qagħda ideali tefa’ ftit għoli.
Huma komplew jiddettaw il-logħob u fit-23 minuta Steve Pisani kellu xutt insidjuż mid-distanza li ġie mdawwar f’corner b’mod stupend mill-goalkeeper ta’ Mosta, David Udoh Akpan.
Kulma jmur kompla d-dominju assolut tal-Wanderers u man-nosfsiegħa logħob Geoffrey Edwin Achempong, kellu l-konklużjoni tiegħu li ntemmet ftit għoli.
Fil-ftuħ tat-tieni taqsima eżattament fis-47 minuta, il-Wanderers qalgħu daqqa ta’ ħarta hekk kif spiċċaw jilagħbu b’10 players meta tkeċċa għalihom l-iskorer prolifiku mill-Ghana, Geoffrey Edwin Achempomg, wara li ntwera żewġ karti sofor fil-partita, bit-tieni waħda jirċeviha wara foul li wettaq fuq Thomas Shedrack Tegwi.
Madankollu, huma xorta waħda rnexxielhom jiftħu l-iskor fit-53 minuta meta Jonata Bastos De Oliveira xeħet cross mil-lemin fid-direzzjoni tal-Isloven VITO PLUT li kien pront u antiċipa lil Sasha Cachia u tefa’ l-ballun fis-saqaf tax-xibka, b’dan ikun is-66 goal tiegħu kemm ilu jilgħab f’Malta.
Sliema komplew jippressaw u fl-74 minuta kienu għoddhom irduppjaw l-iskor meta Bastos De Oliveira reġa’ xeħet cross mil-lemin li din id-darba sab lil Samuel Gomes Da Mata li wiċċ imb’wiċċ ma’ Akpan ra lil dan tal-aħħar isalva bi bravura f’corner biex salva goal ċert.
Dan sabiex fis-87 minuta cross-shot ta’ Steve Pisani dejjem għall-Wanderers ġie salvat b’diffikultá minn Akpan.
Minuta biss wara kien imiss lil Mosta li jispiċċaw jilagħbu b’10 players meta din id-darba tkeċċa l-goalkeeper Akpan waar foul li wettaq barra l-kaxxa fuq iż-żagħżugħ Neil Frendo, biex minfloku daħal jilgħab il-goalkeeper Sean Mintoff u ċeda postu Nathan Agius.
Il-Wanderers issiġilalw ir-rebħa fil-ħin miżjud permezz ta’ xutt fil-baxx ta’ SERGIO FILIPE RAMOS DA SILVA wara li rċieva minn pass intelliġenti ta’ Samuel Gomes Da Mata.
Referee: Fyodor Zammit
