Is-Sindku tal-Qala, Pawlu Buttigieg, appella lill-Awtorità Maltija għall-Ambjent u r-Riżorsi, l-ERA, biex tieħu d-deċiżjonijiet meħtieġa minnufih ħalli r-ramel fil-Bajja popolari ta’ Ħondoq ir-Rummien jitnaddaf kompletament mil-likwidu mxaħħam minn tal-fish farms li niġġes iż-żona fl-aħħar jiem.
Waqt li l-baħar tnaddaf u reġa’ lura għas-sbuħija naturali tiegħu, jirriżulta li dan affettwa ħażin ukoll ix-xtajta ramlija, li wassal biex ir-ramel fl-ilma ġie jwaħħal qisu kolla u jeħel ma’ kull min jaqbdu b’idu.
Għaldaqstant, is-Sindku Laburista, li baqa’ sinonimu wkoll għall-ġlieda tiegħu fuq għexieren ta’ snin biex l-art fil-limiti tal-Qala tkun protetta minn kull tip ta’ żvilupp, kif ġie garantit fl-aħħar ġimgħat, appella biex ma jkunx hemm iżjed tkaxkir tas-saqajn u l-bajja popolari kull sajf tkun tista’ tibda terġa’ titgawda.
F’vidjow, li tella’ fuq Facebook, Buttigieg issuġġerixxa biex l-ERA temporanjament tressaq ir-ramel affettwat mal-ġenb, ħalli l-bajja, li għandha l-Blue Flag, terġa’ tattira lill-għawwiema lokali u turisti malajr kemm jista’ jkun.
Hu semma li persuni, li niżlu jgħumu, sabuha saħansitra diffiċli biex jinħaslu u jneħħu r-ramel minn ma’ ġisimhom, lanqas bl-użu tas-sapun, waqt li qal li l-bajja qatt qabel ma ntlaqtet minn tniġġis simili.
Appell li kien diġà sar fl-2019, iżda korrispondenza mill-ERA, li ra ONE News, qalet li dan ma jidhirx li kien tajjeb biex jintefa’ fil-bajja, anke jekk kien ġie indikat li kellhom ikunu testijiet ulterjuri li jiddeterminaw dan.
Fil-bidu ta’ din il-ġimgħa, rappreżentanti tal-ERA, id-Direttur Joseph Cutajar mill-Ministeru għal Għawdex u l-Ippjanar u Dr Charlon Gouder mill-Federazzjoni Maltija tal-Produtturi tal-Akkwakultura, għamlu spezzjoni fuq ix-xtajta ta’ Ħondoq, fejn ġie determinat li għandu jsir it-tindif tar-ramel b’mod manwali.
Minkejja dan, jirriżulta li l-Ministeru għal Għawdex qed jistenna l-approvazzjoni finali tal-ERA qabel jipproċedi bix-xogħlijiet meħtieġa.
