Iċ-ċampjins Maltin Hamrun Spartans, it-Tlieta filgħaxija kienu fl-azzjoni fl-ewwel leg tat-tieni rawnd tal-UEFA Ewropa Conference League meta fil-Kosovo huma spiċċaw il-konfront kontra FC Ballkani fid-draw ta’ mingħajr gowls.
Minkejja l-ħafna pussess li gawdew l-avversarji tal-Maltin, Hamrun kienu kompatti tul id-90 minuta u qatt ma’ rnexxilhom jegħlbu lill-goalkeeper internazzjonali Malti fil-ftit okkażżjonijiet denja ta’ nota.
Kienu Hamrun li fetħu tajjeb u wara kważi għaxar minuti konklużjoni ta’ Joseph Mbong ġiet mblukkat f’corner liema corner għal ftit ma’ wassalx għal azzjoni perikoluża fuq il-lasta tal-Maltin iżda l-kontrattakk ta’ Karrica ġie kkontrollat tajjeb minn Bonello.
FC Ballkani ġew mogħtija penalty xi ftit dubbjuż fil-19 il-minuta meta Karrica deher li possibilment kellu kuntatt mad-difensur brażiljan Emerson Marcelina bir-referee jordna penalty li minnhu Lindon Emarllahu xeħet barra.
Għaxar minuti minn tmiem l-ewwel taqsima Bonello salva tajjeb free-kick fit-tul ta’ Marsel Ismajlgeci u eżatt qabel it-tmiem tal-ewwel 45 minuta, Ballkani għal ftit ma’ marrux fil-vantaġġ meta l-konklużjoni b’saħħitha ta’ Potoku għaddiet kemm kemm għoli.
L-azzjonijiet fit-tieni taqsima kienu rari ħafna bl-ewwel waħda tasal mas-siegħa logħob meta Hamidi ra’ x-xutt tiegħu salvat tajjeb minn Henry Bonello. Bonello mill-ġdid attent fiż-żewġ azzjonijiet li segwew fil-66 u fil-69 minuta meta l-ewwel konklużjoni ta’ Karrica ġiet salvat u wara Engjell xeħet barra.
Lejn it-tmiem, preċiżament fil-90 minuta Dulaj minn tarf il-kaxxa fajjar xutt li għal darboħra ġie salvat bla wisq diffikulta minn Bonello biex b’hekk il-partita intemmet fid-draw ta’ 0 – 0 biex issa Hamrun Spartans jilgħabu f’pajjiżna t-Tlieta 30 ta’ Lulju fil-20.00.
