Ħamsa u tletin elf persuna ħonqu l-Fosos tal-Furjana t-Tlieta filgħaxija għall-akbar kunċert b’xejn li jittella’ fl-Ewropa – l-Isle of MTV. Dan il-kunċert mhux biss sar appuntament annwali għall-Maltin, iżda wkoll jara ammont ta’ turisti li jiġu f’pajjiżna speċifikament għal dan il-għan.
Il-kunċert beda bis-sehem ta’ diversi aritsti Maltin, fosthom Klinsmann u Sarah Bonnici.
Kompliet wara l-istilla tal-mużika kontemporanja u rebbieħa ta’ żewġ Grammy Awards, Nelly Furtado, ikona tas-snin elfejn, li mhux l-ewwel darba tat prestazzjoni f’pajjiżna. Hi kienet akkumpanjata wkoll minn kantanta oħra ta’ fama internazzjonali Liliana Saumet.
RAYE, rebbieħa ta’ diversi Brit Awards, li wkoll mhix l-ewwel darba tagħha li allegrat lil dawk li jattendu għal dan il-festival, ukoll tat prestazzjoni li laqtet il-gosti ta’ ħafna bil-vuċi partikolari tagħha.
Wara, kien imiss lid-DJ ta’ fama dinjija, DJ Snake, li kien akkumpanjat ukoll bil-logħob tan-nar.
Waqt dan il-festival kien hemm ukoll bosta ta’ DJs Maltin, li komplew jagħtu ħajja lill-folla numeruża li ksiet il-Fosos tal-Furjana.
Tul is-16-il edizzjoni tiegħu, l-MTV għaqqad lil eluf ta’ fanatiċi tal-mużika, filwaqt li ġab lejn pajjiżna artisti bħal Lady Gaga, Snoop Dogg, David Guetta u Enrique Iglesias.
L-ispettaklu f’pajjiżna issa se jkun qed jintwera fuq l-istazzjon mużikali MTV fl-14 ta’ Settembru f’aktar minn 150 pajjiż, filwaqt li se jkun ukoll on demand – xi ħaġa li tkompli tkabbar isem ta’ pajjiżna barra minn xtutna.
Dan il-festival ikun ikkaratterizzat ukoll mill-MTV Malta Music Week, ġimgħa ta’ divertiment, li din is-sena rat is-sehem ta’ artisti bħal Benni Benassi, u Icona Pop.
Ritratti: Kimberley Sacco Baldacchino
