Għadd kbir ta’ għalliema fil-livelli kollha tas-settur edukattiv ġew informati b’dak li jinkludi l-pakkett finanzjarju, li se jgawdu minnu u li ġie maqbul mal-Unjin tal-Għalliema, l-MUT, ftit tal-ġranet ilu. Sal-lum edukatur li jibda jaħdem bħala għalliem fi skala 9, idum 16-il sena biex jilħaq il-massimu tal-iskala 7. B’dak li qed jiġi propost, dan il-perjodu se jiqsar għal 8 snin.
Il-benefiċċji abbundanti, inklużi fil-ftehim kollettiv ġdid, huma bla preċedent fl-istorja tal-edukaturi Maltin u Għawdxin u jlaħħqu għal żidiet ta’ eluf kbar kull sena.
Korrispondenzi, li għandu f’idejh ONE News, juru li għalliema, bħal dawk fi Skali 8 u 9 taċ-Ċivil, Education Officers, kapijiet ta’ skejjel u Kindergarten Educators u LSEs livell tnejn fl-aħħar sigħat irċevew notifika ffirmata mis-Segretarji Permanenti Matthew Vella għall-Ministeru tal-Edukazzjoni u Joyce Cassar mill-Uffiċċju tal-Prim Ministru.
Fiha dawn ġew informati eżatt kif se jkunu qed jiggwadanjaw, skont il-grad tagħhom, u kif dak dovut lilhom se jkunu qed jieħduh b’lura mill-1 ta’ Jannar tal-2023.
Fl-istess korrispondenza jingħad li qed jiġu informati biex tiġi evitata kull tip ta’ miżinformazzjoni.
ONE News jifhem li gradi oħrajn tal-edukaturi qed jirċievu korrispondenzi simili.
Ħarsa lejn it-tagħrif fl-ittri, jirriżulta li, pereżempju, l-edukaturi fi Skali 8 u 9, setgħu jaslu sa massimu Skala 7, jiġifieri ftit aktar minn ħamsa u tletin elf ewro fl-2022, skont il-ftehim l-antik. Iżda b’dak maqbul mal-MUT, dan issa sal-2027 jistgħu jitilgħu sa aktar minn sebgħa u erbgħin elf fis-sena, skont is-snin ta’ servizz.
Qabża ta’ tnax-il elf ewro, minbarra li se jiġi ttripplat l-għadd ta’ allowances minn tlett elef u seba’ mitt ewro fl-2022 għal għaxart elef u ħames mija sal-2027.
Dawk fil-livell ta’ Education Officers, se jaraw qabża li tilħaq il-massimu ta’ ftit inqas minn ħmistax-il elf ewro, flimkien ma’ allowance li jirdoppja minn sitt elef u ħames mitt ewro sal-2022 għal tnax-il ef u ħames mitt ewro jew tlettax-il elf sal-2027.
Iż-żieda maqbula għall-Kapijiet tal-iskejjel tissarraf f’aktar minn ħmistax-il elf ewro minn massimu ta’ ftit inqas minn tnejn u erbgħin elf sal-2022 għal ftit inqas minn tmienja u ħamsin elf sa tliet snin oħra. Dawn se jimxu għal Skala 4 b’mod awtomatiku kemm-il darba għandhom ħamsa u għoxrin sena servizz, bl-aħħar ħames snin bħala Surmast.
L-allowance sħiħa tagħhom, li tinkludi dik skont il-popolazzjoni tal-iskola, wkoll tirdoppja sal-2027.
Fil-każ ta’ LSEs, il-ftehim mal-MUT jistipula li l-massimu li setgħu jilħqu sa sentejn ilu, jiġifieri inqas minn disgħa u għoxrin elf ewro, sa ħames snin oħra jistgħu jilħqu massimu ta’ bejn ftit inqas minn sebgħa u tletin elf ewro għal dawk bi kwalifika Livell 6 MQF u disgħa u tletin elf u mitt ewro għal dawk f’Livell 5 tal-MQF.
L-allowances tagħhom se jiżdiedu minn elfejn, erba’ mija u ħamsin ewro sa tmint elef u ħames mitt ewro.
Kindergarten Educators ukoll se jgawdu minn żidiet li jikkwantifikaw sa ħdax-il elf ewro u allowances li jiżdiedu bejn wieħed u ieħor, tlieta jew erba’ darbiet, skont l-iskala.
Dawk fil-livelli kollha, li jkollhom għoxrin sena servizz, se jibqgħu jgawdu wkoll minn elfejn ewro addizzjonali. Dan flimkien ma’ elf ewro ieħor fis-sena għal dawk li huma wkoll ikkwalifikati fl-Ewwel Għajnuna.
