Hekk kif din il-ġimgħa qed tiġi ċċelebrata l-Festa ta’ Marija Annunzjata f’ Ħal Tarxien, l-Għaqda tan-Nar San Gabriel se tkun qed tipprova tikser rekord nazzjonali marbut man-nar tal-art.
Dan ir-rekord, li se jkun qed jiġi vverifikat minn ‘The Malta Records’, se jkun qed jikkonsisti mill-akbar raddiena universal bla salib, bl-inqas ammont ta’ support bejn il-universal joints, u bl-inqas ammont ta’ funtani f’kull qalba.
Rigward ir-raddiena li biha l-Għaqda se tkun qed tidħol b’tentattiv fil-Malta Records, tkellimna ma’ Colin Tirchett, pirotekniku li kien il-moħħ wara din il-biċċa t’arti.
“Ir-rekord huwa ta’ raddiena universal mingħajr salib, bl-inqas sapport bejn il-universal joints, u tinbaram fuqha nnifisha. Dak huwa bażikament m’hawnx bħalha f’Malta u qatt ma rajna.”
Rigward l-ispettaklu tan-Nar u n-Nar tal-art li se jkun qed jittella’ s-Sibt filgħaxija, tkellimna ma’ Rodney Pisani, fejn tagħna togħma żgħira ta’ dak li wieħed jista’ jgawdi f’Ħal Tarxien.
“L-Għaqda tan-Nar San Gabriel ser torganizza l-edizzjoni Sky full of Stars, il-ħames edizzjoni tagħha, li se tkun tikkonsisti f’ħarqa nar tal-ajru li jibda’ fid-disgħa u nofs u mbgħad ikun hemm show pyro-musical bil-mużika flimkien mall-piroteknika, u mbagħad fil-ħdax u nofs ikun hemm il-ħarqa tan-nar tal-art. Kif qed taraw dan ix-xogħol kollu maħdum mill-Għaqda tan-Nar San Gabriel, u mbagħad l-attrazzjoni se tkun din ir-raddiena li se tkun tentattiv għall-Malta Records.”
L-ispettaklu tan-nar tal-ajru jibda għall-ħabta tad-9:30pm filwaqt li dak tal-art jibda għall-ħabta tal-11:30pm fi Triq Palma.
