Matul din il-ġimgħa ntlagħbet l-aħħar ġurnata ta’ logħob mill-kampjonat nazzjonali u dak reġjonali organizzat mill-Malta Blackball Federation fejn saru magħrufa wkoll xi verdetti.
Ħamrun 147 A temmew fl-ewwel post tal-klassifika wara rebħa tajba ta’ 11-4 kontra Qormi Anici B. Min-naħa tagħhom, Cospicua Rangers spiċċaw fit-tieni post wara li għelbu lil Jojo’s Birżebbuġa 11-8.
F’aktar logħbiet, Qormi Anici A u Valletta Breakwater għalqu l-ewwel fażi bl-aqwa mod wara rebħiet kontra San Ġwann Nick’s A (11-9) u Ħamrun 147 B (11-6) rispettivament.
Fil-kampjonat reġjonali, Ħamrun 147 C spiċċaw l-ewwel b’sitt punti vantaġġ fuq l-eqreb rivali Ħamrun 147 D. Dawn tal-aħħar kienu fl-azzjoni fejn rebħu 11-6 barra minn darhom kontra Domus Kids Żejtun A.
Selmun Bar A għelbu lil PL Balzan A 11-8 filwaqt li kien hemm dominju assolut ta’ Każin Pinto Qormi A li għelbu lil Valletta Fossa Boys A 11-0.
Sadanittant fl-aħħar jiem ta’ Mejju se jintlagħbu l-logħbiet tal-play-offs bil-finali tal-kampjonati kollha skedati għall-ewwel ġimgħa ta’ Lulju.
Fil-fatt nhar l-Erbgħa Valleta Breakwater jilagħbu kontra Ħamrun 147 B fl-aħjar minn żewġ legs bir-rebbieħ li jilgħab fis-semifinali kontra Cospicua Rangers.
Sadanittant, Ħamrun 147 A diġa’ jinsabu fil-finali u jistennew ir-rebbieħ mill-konfront li se jkun hemm fis-semifinal.
Fiċ-Challenge League, Jojo’s Birżebbuġa jilagħbu s-semifinali kontra San Ġwann Nick’s A sabiex min jirbaħ jilgħab il-finali kontra Qormi Anici A.
Fil-kampjonat reġjonali, Domus Kids Żejtun jilagħbu l-play-off kontra Selmun Bar A u min jirbaħ jilgħab is-semifinali kontra Ħamrun 147 D. Eventwalment il-finalist jilgħab kontra Ħamrun 147 C li kkwalifikaw bħal l-ewwel tim fil-grupp.
Fil-Community League, se jkun hemm is-semifinali fejn Qormi Anici D jilagħbu s-semifinali kontra Juve Birkirkara A filwaqt li San Ġwann Tiki Taka B jilagħbu kontra San Ġwann Tiki Taka A.
Finalment fl-Amateur League, Taċ-Ċaċċu Qormi jaffrontaw lil Mrieħel Billiard House b’Juve Birkirkara B li jilagħbu kontra Qormi Anici E. Ir-rebbieħa jilagħbu kontra s-semifinalisti Birkirkara Boċċi u Valletta Fossa Boys B.
KLASSIFIKA – KAMPJONAT NAZZJONALI
Ħamrun 147 A 35, Cospicua Rangers 32, Valletta Breakwater 25, Ħamrun 147 B 24, Qormi Anici A 15, Jojo’s Birżebbuġa 13, San Ġwann Nick’s 10, Qormi Anici B 5.
KLASSIFIKA – KAMPJONAT REĠJONALI
Ħamrun 147 C 28, Ħamrun 147 D 22, Domus Kids Żejtun, Selmun Bar A 18 , PL Balzan A 14, Każin Pinto Qormi A 10, Valletta Fossa Boys A 9.
